查爾頓喺周一主場0:2輸埋俾熱刺後，正式宣布護級失敗，下季英冠再見！不過查爾頓球迷又唔使咁灰，佢哋最近傳有大財團收購，話唔定下季就升番上嚟。至於位列倫敦嘅屈福特一早篤定降班，𠵱家輪到查爾頓，第3支唔通又係倫敦球隊嘅韋斯咸？
煞科日3隊爭出生天
英超煞科戰喺嚟緊周日上演，前4名歐聯席位大定，但歐協盃同降班組仍然爭崩頭。𠵱家排尾3嘅韋根護級形勢最險峻，佢哋只得35分，暫落後韋斯咸3分，但得失球稍稍佔優。韋根煞科戰要作客同有降班威脅嘅錫菲聯，贏唔到嘅話即時護級失敗。
另一邊嘅韋斯咸煞科戰雖然要作客曼聯，但紅魔已經攞咗聯賽冠軍，韋斯咸和波都唔使降班，不過唔知紅魔會唔會放你一馬啫。皆因喺94/95球季，曼聯最尾嗰場就係賽和咗韋斯咸，搞到最後俾布力般流浪攞咗聯賽冠軍；但係事隔咁耐，費Sir會唔會搏命大炒韋斯咸而賽後開慶祝派對，我求大俠就唔知喇。話時話，曼聯嘅里奧費廸南同韋斯咸嘅安頓費廸南係親兄弟，點都留手啩？