8號仔嘅「4網合一」喺二少強勢領導之下，都唔係話嘢嘢可嚇窒啲弱家對手，好似香港寬頻老闆王維基（圖）咁，永遠唔會同二少鬥錢多，但經常食腦搵位寸吓呢個強勢對家！
就噚日，老王吹雞搵班老友出嚟，講吓佢對電訊管理局OFTA就住8號仔網上行一單廣告具誤導性嘅裁決睇法！單嘢係05年4月香港寬頻向OFTA投訴，話網上行04下半年度嘅廣告誤導（例如上下行唔對稱之類），OFTA最初判8號仔冇違反電訊條例，但老王舊年5月向電訊（競爭條文）上訴委員會上訴，今年1月經過3次聆訊之後上訴得直。
老王對呢個遲嚟嘅判決當然高興，但噚朝早喺網上仲見到網上行話上傳速度有6M佢就更㷫，OFTA係咪偏幫8號仔呢？
老王話唔敢亦唔想批評OFTA，只希望OFTA強硬起嚟維持公平競爭。
老王話賣廣告sell內容無可厚非，但做唔到就唔好誤導消費者，上行傳送明明只得0.64M，千祈唔好話上下行有6M。講到呢度，佢仲攞埋道具出嚟，話好似手上件恤衫，明明邊長邊短，點可以話係長袖衫呢！