唉！紐卡素領隊羅達日前終於辭咗職，我求大俠覺得佢其實有啲料到，話晒紐記今季傷兵名單水蛇春咁長，但羅達喺冇乜人用之下都交到啲成績，算喺咁啦。好似羅達就曾經誇口講過，今季佢哋嘅傷兵人數係全球歷史上最多嘅，所以佢今次突然請辭，話唔埋實情係俾人炒。咁又係嘅，紐卡素今季肯定無緣歐洲賽，近5場主場又入唔到波，原來呢個喺聖占士公園超過450分鐘冇「士哥」嘅羞家紀錄，係球會自1951年以嚟從未試過嘅。所以羅達係引咎辭職，定係暗地裏俾人炒，就真係佢自己先知喇。
教咗紐卡素15個月嘅羅達辭職冇耐，我求大俠即時八到最有機會頂替佢個位嘅，係同於最近請辭保頓領隊一職嘅「大儍」艾拿廸斯，不過紐卡素嗰邊又係例牌否認，我就放長雙眼睇吓，最後艾拿廸斯會唔會成為紐記主帥？
老實講，羅達今季可用嘅人真係有限，買入嘅奧雲傷咗大半季，𠵱家呢位前鋒可以傷癒復出，但就輪到羅達走人，佢兩個真係冇乜緣份。不過紐卡素球迷又唔使咁灰，紐記陣內大把年輕球員，好似史提芬泰萊、大衛艾格同亨廷頓等，希望在明天吖嘛！