「Let'sgetitdone」（讓我們一起做好佢）係花旗集團全球宣傳活動嘅口號，係咪有啲似當奴曾蔭權競選連任特首時嘅口號「I'llgetthejobdone」（我要做好呢份工）？聽講，兩者純屬巧合，花旗嘅構思好早就已經有，但俾當奴嗰邊早一步出街。
為咗慶祝林森成（Sim）上任花旗香港區行長，噚日花旗集團喺香港搞咗個酒會，畀面出席嘅有金管局副總裁韋柏康、中信泰富董事總經理范鴻齡；當中唔少地產商好似新世界發展主席鄭裕彤、合和副主席何炳章，鷹君集團主席兼董事總經理羅嘉瑞等，梗係啦，話晒花旗係佢哋嘅往來銀行，最好大家好來好去、唔會落雨收遮。
講開遮，喺花旗集團嘅新品牌形象裏面，就真係冇咗把紅色遮仔，改為一道紅色橋樑，比喻能助客戶將夢想成真。