今年係豬年，好多人都想生番個聰明豬BB，難怪孕婦隨街可見。陀仔最受壓的是腰背位置，所以各準媽咪要特別注意腰背健康，物理治療師陶麗敏更稱經常見到孕婦在日常生活中做一些傷害腰部肌肉的動作，而她更再三提醒孕婦千萬不可蹺腳坐，因為可傷腰及盆骨，生BB會較辛苦。
記者：黃錫蓮
攝影：陳陶鈞、周旭文
模特兒：Ada@TheGroup
資料提供：物理治療師陶麗敏（啓康物理治療中心）
香港中醫藥管理委員會註冊全科中醫趙生
孕婦特別注意姿勢正確
唔講唔知，原來好多大肚媽咪日常在公司或在家中都會做錯好多姿勢，唔單止自己辛苦，未出世的BB都覺得唔舒服。如果長期咁做，就會增加腰背壓力，傷到肌肉，臨盆時就要承受雙重痛楚，咁就唔抵啦！所以大家留意吓平日有冇做錯以下姿勢，趁仲有時間，跟住物理治療師所教的姿勢，快啲改邪歸正啦！
執正6大日常姿勢
1.坐姿
彎腰蹺腳坐會壓着BB，佢會好唔舒服。長期咁坐，後果最嚴重會傷腰背和盆骨，唔單止腰背會痛，仲有可能會行動不便，增加生BB的風險，後果可大可小！
2.執嘢
3.站立
4.取高處物件
5.上床
6.睡姿
孕婦飲湯水保體質
生仔前補充體力
很多人認為大肚婆要食2人份量的食物，但註冊中醫師趙生就提醒孕婦食太多只會致胖，只要在產前調節飲食來助胎兒成長就可以了，趙醫師話：「胎兒生長需要蛋白質和某些維他命，所以每天應至少有1餐含高蛋白質成份的食物，好似肉類、魚類、蛋或芝士。多吃新鮮水果和蔬菜，使胎兒可獲得足夠的維他命。另外，維他命C係唔可以儲存的，所以每天都要補充，要BB骨骼健康成長，仲要每天飲牛奶或食芝士！」
除了食之外，廣東人一向都鍾意飲湯，原來湯水對孕婦特別有益，咁究竟飲乜湯水好呢？趙中醫師就大力推介以下的產前湯水，大家不妨試試！
蟲草杞子水鴨湯
材料：北蟲草3錢、枸杞子3錢、淮山藥5錢、龍眼肉4錢、亁瑤柱半両（約4粒）、水鴨半隻、鹽適量
做法：洗淨水鴨，放滾水中煲3分鐘；洗淨亁瑤柱後用暖水浸半小時；洗淨藥材，所有材料放入湯煲內及加適量清水，以慢火煲2小時後加鹽即可。
有幾勁：北蟲草、枸杞子、龍眼肉及淮山可補腎護肝，安胎養神；水鴨、亁瑤柱、食鹽能滋養肌膚及具提神功效。
花旗參瘦肉湯
材料：花旗參片3錢、麥冬4錢、天冬3錢、龍眼肉5錢、蜜棗1粒、甘笋3條（約半斤）、急凍螺頭1隻、瘦豬肉6両、鹽適量
做法：用暖水將螺頭解凍，洗淨後用滾水煲5分鐘後去內臟備用；洗淨瘦肉，放滾水中煲3分鐘後撈起備用；洗淨甘笋後去頭尾切段備用；將所有材料放入湯煲內並加入適量清水，以慢火煲2小時後加鹽調味便可。
有幾勁：花旗參片、麥冬、天冬、龍眼肉補充體力，消除產後疲勞；甘笋清熱氣利小便，消減體內酸性；瘦豬肉、螺頭補充蛋白質及氨基酸。
生仔後調補為主
生仔咁辛苦，好多媽咪生完後都會進補，不過補還補，千祈唔好過量，所謂物極必反，患上產婦肥胖症就得不償失啦！趙醫師話：「其實產後多食水果，多食蔬菜就最好。因為水果和蔬菜可增加產後身體所需要的多種維他命、高纖維素，使每天大便暢通。多飲調補身體湯水，更可以調補婦女產後比較虛弱體能。」
花膠高麗參活血湯
材料：花膠2両、高麗參片4錢、白蓮子1両、霍山石斛2錢、淮山藥5錢、龍眼肉4錢、黑棗3粒、金華火腿1両、新鮮瘦豬肉6両、鹽適量
做法：用暖水浸花膠10個鐘，用薑水灼一灼後，再用清水浸10個鐘頭後撈起備用；用暖水浸金華火腿1個鐘後撈起切片備用；用暖水浸淮山片、白蓮子半小時後撈起備用；洗凈豬瘦肉後以滾水煲3分鐘後撈起備用；將所有材料放入湯煲內加水，以慢火煲2小時後加鹽即可。
有幾補：花膠活血生血，補血壯體；高麗人參片、龍眼肉補氣健腦、增強體力；白蓮子、淮山藥、霍山石斛健脾生津，令膚色潤澤。
姬茸芪參湯
材料：姬松茸1両、北芪/紋黨參/玉竹頭/淮山藥各5錢、正南棗3粒、瘦豬肉6両、鮮海魚1條、鹽適量
做法：洗凈瘦肉以滾水煲3分鐘；洗淨海魚並去內臟，再起油鑊將魚煎亁水份後剷起備用；將所有材料放入湯煲內並加水，以慢火煲2小時後加鹽即成。
有幾補：金姬松茸、生北芪、紋黨參增強免疫功能，抗病防病；玉竹頭、淮山藥、正南棗健脾補氣、滋陰益腎；瘦豬肉及海魚可補充營養、調補身體。
