早排《蘋果》車版都介紹過豐田「就嚟」做一哥（即係全球汽車生產量最高銷量車廠），之所以用「就嚟」呢個字眼，係因為當時只係以預計今年度嘅銷售量嚟推測，不過廠方已發表咗最新嘅實際數字，話由今年1月至3月期間，汽車銷售量已達到235萬架，比起一直係世界第一嘅通用汽車（226萬架）更高，即係話豐田已經名正言順登上世界第一之位，真係可喜可賀。喜上加喜係適逢豐田成立七十周年，喺今年做埋No.1，對佢哋嘅意義就更大。講起歷史，各位又知唔知豐田原本係靠做乜嘢起家呢？真係講都無人信，原來喺1937年成立嘅豐田汽車，最初係由一間叫做豐田自動織布機工廠（ToyodaAutomaticLoomWorks）分拆出嚟。至於點解豐田嘅名稱會由TOYO「D」A變成咗TOYO「T」A呢？原來係貪佢發音響啲容易入腦喎，另一個原因就係唔想將車廠同織布廠兩者混淆，咁又係，如果唔分開，陣間有人話送部豐田車畀我，我都唔知佢係送部汽車定衣車呀！
悠穎馳
豪邁不羈，愛車如命，聽幾下引擎聲就知咩車！