香港回歸阿爺10周年嘅大日子好快就到，對於一眾愛國企業、媒體嚟講，呢個日子非同小可，事關有錢出錢有力出力，務求喺阿爺面前加得幾多分就得幾多分，就算地位顯赫如新世界主席彤叔都唔例外！
彤叔檔新世界下面有壇信通傳媒，噚日同北青傳媒搞咗個「慶祝香港回歸十周年」活動合作協定簽約儀式暨記者會，之前就打鑼打鼓話彤叔會現身撐場，點知華華臨場先知，主禮嘉賓彤叔noshow，咁彤叔貴人事忙唔嚟唔出奇，只係奇在佢唔嚟撐自己個場，但就走咗去撐人哋個場，咪就係花旗銀行香港一哥林森成嘅迎新派對囉。
訪問升旗阿sir
鬼咩，嗰邊唔少地產商畀面出席，話晒係同行，彤叔梗係去見吓朋友湊吓熱鬧開心啲啦。可憐佢自己呢邊個記招，全程計埋影合照只得11分鐘、主禮嘉賓因公務繁忙走先，搞到要記者填表問問題等呢啲騎呢嘢，不過呢次中港戰略合作（主辦單位話），都係「非常值得」同大家分享！
彤叔呢個回歸活動，內容包括10月嗰陣，信通同北青兩間傳媒會組織內地企業、媒體、商家等落香港打18個洞，「增加兩地商家交流」，而五一黃金周前夕《北京青年報》已經整咗個「慶祝香港回歸十周年金版」，一直出到十一國慶前夕。
佢哋仲計劃推出一系列回歸見證者專題，包括訪問第一位升起五星旗嘅香港警察（係負責扯起國旗嗰位阿sir），同末代港督肥彭…睇完呢啲咁「偉大」嘅構思，只可以講，原來肥佬黎啲要求都未算過份囉！
[email protected]