有人話網絡電話Hit唔起係因為要連住電腦打，極受地域限制！Skype手機叫勉強解決問題，但機種少、安裝複雜，網絡商仲要收你過百蚊月費，抵打感覺馬上大扣分！總部來自印度的Globe7話你知，網絡電話可以好簡單，化身室內無線電話，USB手指電話，$800-$999一年全球任打25個國家！怕MissCall？佢仲可以平到1仙美金（約$0.078港元）飛線落香港固網及手提電話，真係平到有啲過份！
記者：陳國輝
攝影：譚盈傑
Model：CiCi、Edmond
出街入屋兩種玩法
雖則話網絡電話，但要用得方便就手，所以都做到成部電話咁款！屋企用最方便係扮到室內無線電話咁款嘅WIPA，佢插嘅唔係電話線，而係佢屋企嘅電腦USB接線，咁你就可以在10米無線範圍內，任傾網絡電話。
至於經常要出Trip周圍走嘅人，佢仲有一款ISPA內存記憶網絡電話；外形睇落成隻「USB手指」，實情佢除咗內置1GB容量，隔籬仲插住一隻2.5mm耳機，可以好似Hands-free咁打電話；只要第一次做好登記手續，自此拮落任何電腦USB插口，就可以「直接執行」即打網絡電話，既實用又方便。
飛線落手機扮真電話
屋企有人出埠做嘢、讀書，打長途電話費實在幾甘！最近Globe7喺香港新推網絡電話，一次收費$800-$999（連無線網絡電話或USB網絡電話），就可以1年任打全球25個國家長途電話，擺明力挑老牌Skype地位！
新官上場，當然有撚手嘢，佢同Skype最大分別，係Globe7並非純電腦軟件！裝軟件、上網成功登記後，佢真係會幫你出個美國電話號碼：「VolP必須連接上網，咁其他外國朋友打畀你，咪一定用電腦聽先得？」錯！因為Globe7真係有「電話號碼」，所以可以做到飛線功能；只要你事先上網Login咗Globe7，喺網上做好飛線（可飛落手機或固網電話，每次收費約1仙美金），只要熄電腦時唔好Logout，咁任何Globe7電話都可以用手機聽，同真正IDD近乎一樣，兼且永冇MissCall！
固網、手提打出收費有別
25個「免費長途」國家，基本都係香港人最熟悉嘅地方；好似香港、中國、加拿大、美國、新加坡、阿根廷，不論你用Globe7打網絡長途畀固網或手提都係完全唔收錢；不過另外的19個國家（如日本、南韓、台灣、法國、英國及荷蘭等），就只限致電固網電話完全免費，呢樣又贏Skype；如果要打當地手提，東南亞地區大概要另收2仙美金/分鐘的通話費，維起係毫零紙港幣1分鐘；要收錢都唔願㗎喇！不過一樣平過你打長途多多聲！
Globe7通話StepbyStep
Step1
跟機會送一張電話卡，必須擦走銀色部份，並記低DeviceNo.及PIN碼。
Step2
將Software插入電腦之後，會自動安裝，然後輸入剛才兩組號碼。
Step3
Globe7會Send個ID及密碼畀你，每次登記嗰陣必須輸入，全程只需十零分鐘！
實地測試
兩個Globe7雖然係「美國電話號碼」，但接線速度好快，感覺「冇時差」！好似打出、打入香港手提電話一樣；話音表現尚算清晰，不過間唔中會「斷音」，有隔半秒連番線感覺，整體感覺尚可。
Globe7（36535533）
