港股又創新高，幫客仔落盤啲證券行亦水漲船高。喺寶島算得上大阿哥嘅寶來證券，舊年喺香港賺多4倍，年初攞埋資產管理牌照，噚日正式喺香港成立資產管理部。
噚日隻台資新股凱普松首日即潛水，寶來香港區阿頭趙士懿靜雞雞話，如果中港兩地都准上市，啲台資寧願揀內地，都唔願嚟香港。皆因大陸股市長升長有，熱錢多到爆，叫價可以進取啲，新股唔理好醜，升幅都以倍計。但台資喺香港被人壓價外，表現亦有辦你睇。
把握時機噬肥肉
不過，寶來喺香港未算被投資者熟悉。趙總話會將台灣成功經驗搬到香港，不過要有變化，例如台灣甚受歡迎嘅REITs，喺香港未能受捧，公司或會針對港人鍾意嘅行業如資源股，或獨特性行業包裝成基金推出。
近排有機構估計，到09年，波斯灣地區會有2500億至3500億美金（即1.95萬億至2.7萬億港紙）流入亞洲，香港自然係首選地區之一，咁大嚿肥豬肉喺面前，難怪寶來大老細白文正都話，要把握呢個機遇擴大版圖啦！