由佳視到麗的、由麗的到亞視以至無綫，魏秋樺經歷電視台幾番風雲巨變。75年，魏秋樺與鄭裕玲（嘟嘟）投考佳視訓練班，齊齊做茄喱啡扮女兵，辛苦日子一度令魏秋樺受不了而想過退出，當年若不是經前輩指點堅持下去，她也不會有機會接拍到《變色龍》和《奇女子》等膾炙人口劇集，成為麗的當家花旦。 撰文：戴彩煥
佳藝電視藝員訓練班畢業的魏秋樺，跟鄭裕玲（嘟嘟）是同班同學，當年黃霑擔任她們的導師、簡而清及鮑漢琳教戲劇、林燕妮和文麗賢教儀態，初出茅廬的她，曾因為工作太辛苦而想過退出。
徐克超嚴格
魏秋樺日前接受本報訪問時說：「訓練4、5個月後，我哋就出去實習，試過一次我同嘟嘟喺李麗麗主演嘅《白髮魔女傳》入面做女兵，拍到最尾先至拍我哋，仲係喺鏡頭前邊：『衝呀！』咁啫，等咗24小時拍個咁嘅鏡頭，都覺得幾可憐、幾辛酸，唔想再做落去！不過嘟嘟好捱得，佢忍耐力好強，冇我咁多怨言，自己初出茅廬乜都唔識，唔明白呢行係要等，後來聽前輩講，佢哋等嘅時間多過拍嘅時間，我做落慢慢至知。」
不過最經典的，還是徐克三日三夜不准她們返家休息，魏秋樺說：「當年徐克做導演，佢拍啲武俠片鏡頭好靚，記得佢拍《金刀情俠》一場重頭戲，一個燈光打成個鐘，徐克唔准我哋班演員返屋企，我哋惟有鋪榻榻米係藝員休息室度瞓，最慘係班茄喱啡，徐克驚佢哋捱唔住偷走，唔畀佢哋離開錄影廠，就算去廁所都要FM（場務）跟住，記得有個茄喱啡俾徐克困咗三日三夜之後，跪喺地下喊住求佢話：『徐導演我可唔可以唔拍，求你放我出去啦！』真係好經典！」
出招搶飯碗
魏秋樺拍完《名流情史》後，獲安排與伍衛國擔演《風雷第一刀》，結果78年8月19日她拍完通宵戲後返家翌日，佳視執笠，一度令魏秋樺感到前路茫茫。
幸佳視執笠後，監製蕭笙帶她與一班幕前幕後投向麗的（亞視前身）懷抱，魏秋樺隨即備受器重，獲安排演出《變色龍》及《奇女子》，可謂塞翁失馬，焉知非福。過檔麗的後，她可有遭受排斥？魏秋樺笑道：「有㗎！多個人搶飯碗喎，班跳樓貨有人要咪算囉，過到嚟仲要擔正。雖然我冇試過俾人批踭，但有次電視台影大合照做個V字手勢，我隔籬個女藝員試幾次位，都係將個V字放喺自己前面，點知一到正式，隻手就遮住我塊面！」
這還不止，魏秋樺指當年花旦們為爭某首席化妝師化妝而鬥早返工，她說：「畀佢化妝威啲㗎嘛，係阿姐身份象徵，如果一早返去見嗰個化妝師同第二個化緊，我哋就會即刻衝去搵最top嗰個髮型師梳頭先。最衰嗰時邱德根成日搞啲鴨仔團嚟參觀電視台，佢搞嗰啲旅行團去完荔園、宋城之後，就會入亞視睇拍戲，我哋又冇化妝梳緊古裝頭，啲鴨仔團係咁影相，仲走埋嚟近距離望你，好似聞你咁，尷尬到死，我哋咪投訴囉，但都冇用，因為啲人鍾意睇我哋唔化妝個樣！最慘係連服裝間都去，睇我哋點樣着古裝，真係冇晒私隱㗎！」
邱德根慳皮
邱德根當年深懂開源節流之道，除開辦旅行團參觀電視台賺一筆外，連廁紙也要分配，魏秋樺說：「當年化妝間每日分配5卷廁紙，啲𨋢星期日同假期會停一部，其實邱生係環保先驅！」
89年，魏秋樺離開亞視到台灣發展，與前男友在越南投資出租的士、興建酒店及地產生意至今，生意雖然早已上了軌道，但她感情仍然未有着落，對此魏秋樺笑說：「揀唔啱，我寧缺莫濫嘛。」
本欄逢周二刊出
