時間：94年4月
地點：香港
人物：周慧敏
經過：香港數一數二嘅玉女掌門人周慧敏，90年以DJ身份加入樂壇，佢憑清純形象同美貌，出道後即迷倒唔少少男少女，但一個人事業總有高低潮，周慧敏喺入行3年後，因為事業一度陷入低潮，要靠谷胸求翻身。
94年4月，周慧敏推出新歌《感情的分禮》，呢首歌一推出後全城哄動，但原因並唔係周慧敏嘅唱功突飛猛進，亦唔係歌曲有乜特別意思，而係周慧敏一反清純玉女造型，以入行以嚟最性感嘅形象出現！
為配合呢首歌嘅宣傳，周慧敏着住一襲宮廷式束腰低胸裙拍MV，豐滿上圍激突非常，人人嘩然。周慧敏當年嘅18世紀宮廷look係由著名形象設計師余家安操刀，當日佢拍MV嗰陣，唔單止吸引大批傳媒採訪，就連喺其他錄影廠做緊嘢嘅工作人員，都走埋入去睇熱鬧，可想而知佢呢個新造型幾咁震撼！
為倪震退隱
不過，97年周慧敏為咗男友倪震毅然引退，一直致力為保護遺棄動物協會等慈善團體工作，直至舊年5月佢重出江湖，喺紅館開三場個唱，不過就再冇機會睇番佢嗰套咁經典嘅宮廷服打扮。
本欄逢周一至周六刊出