韋斯咸前鋒泰維斯最近成為其他英超聯下游球隊嘅「狙擊」目標，因為下游球隊好似錫菲聯、韋根、富咸同查爾頓，打算採取法律途徑，就韋斯咸非法羅致泰維斯一事，要求英超聯賽會扣分處理。
不過呢件事就一啲都冇影響到呢名阿根廷前鋒嘅表現，韋斯咸更喺上周六主場對保頓場聯賽開波前，由會長「冰島蛋」麥紐臣頒個全年表現最佳球員獎座畀佢，真係寸到爆。不過又真係抵韋斯咸寸嘅，因為泰維斯之後梅開二度加埋1個助攻，協助球隊大勝保頓3:1並且升上尾4，暫時脫離降班區，護級露曙光。
其實，既然英聯會就韋斯咸簽泰維斯違反轉會條例，而罰咗佢哋紀錄性嘅550萬鎊（約8,300萬港元），韋斯咸亦同意畀錢，加上英聯會日前又承認泰維斯嘅註冊，即係可以上陣啦，仲扣咩分？
韋斯咸係老牌球會，今次只不過係喺買賣球員上出錯，又唔係打假波或賄賂球證，罪不致死；話晒呢班波有啲星味，唔好話係我求大俠呀，相信好多球迷都唔想見到佢哋再次降班。𠵱家佢哋仲未上岸，希望佢哋喺最後一場聯賽對曼聯時生生性性啦！如果唔係就神仙難救！