韓國人最着重親情倫理，韓星當然唔會例外。阿Net最近喺內地網站《韓劇社區》搵到個「韓國明星家庭照」嘅討論題目，當中有東方神起、李孝利同車太鉉等30幾個韓星同家人嘅合照，其中李秉憲同外公外婆及細妹嘅合照最令人印象難忘，因為憲哥身邊嘅係前女友宋慧喬，真係不禁要慨歎「此情只待成追憶」。
河利秀有勇媽
唔少韓星平時艷光四射，不過佢哋同屋企人合照時就變得好平凡，只有SE7EN同佢兩個家姐嘅相比較特別，因為佢兩個家姐都好上鏡，眼大大鼻高高，唔講仲以為係女藝人。除咗SE7EN外，金泰希個家姐又係好省鏡，跟金泰希、李莞一個餅印咁。
至於河利秀嘅媽咪雖然同普通師奶冇乜分別，但佢咁勇敢支持河利秀變性，證明母愛真係非常偉大。而車太鉉同金楨勳嘅父母外表睇落好慈祥，相信佢哋對個仔喺娛樂圈嘅成績都好滿意。喺討論區度，仲有安七炫斯文look出席大佬嘅婚禮，以及冇乜點化妝嘅李孝利同家人開生日會嘅相，都難得一見㗎！
韓星家庭照
網址： http://www.kdocn.com/bbs/thread-227348-1-2.html
版主：阿Net
本欄逢周一至六刊出