中環在線:連生幫四叔賣嘉亨灣 - 李華華

中環在線:連生幫四叔賣嘉亨灣 - 李華華

唔講唔覺,香港畢菲特、恒地主席李兆基,賣樓嘅推廣手法已經逐漸提升到國際級層次。
華華記得以前每逢假日,恒地新盤都有嘉年華,搵一大堆風水師、魔術師,同懷舊歌星表演,節目安排密過《歡樂滿東華》,仲任食任拎,一次過滿足晒公公婆婆十幾個願望。
唔知係咪有高人教路,近年作風大變,05年推售土瓜灣翔龍灣,就豪擲七位數字,請04年環姐JenniferHawkins為樓盤拍廣告。舊年推售大埔比華利山別墅,又搵05年環姐冠軍NatalieGlebova拍廣告同搞宣傳;聽聞反應唔錯。
四叔今年再下一城,為早前是非多多、但依然大賺嘅西灣河嘉亨灣,喺嚟緊禮拜五搞重推晚會,今次搵《大長今》扮「連生」嘅朴恩惠做主禮嘉賓。
呢兩年韓風勁吹,恒地都唔執輸,起用韓國女星幫手催谷樓盤,唔知係咪想冧區內韓國國際學校嘅老師同家長呢?
[email protected]