馮仁昭四圍超：陳錦鴻接妻兒出院幸福笑不停 - 馮仁昭

陳錦鴻上星期三榮升老竇，佢太太杜雯惠幫佢生咗個7.7磅嘅B仔，同蘇志威老婆劉小慧同一日分娩。蘇志威因為撞啱出外公幹，前日陪唔到劉小慧出院，但杜雯惠就好彩得多，噚日佢出院嗰陣，陳錦鴻全程陪伴左右，一家三口大晒幸福。

BB未改名

噚日中午12點幾，陳錦鴻帶埋菲傭同一位老人家去到養和醫院接杜雯惠同B仔出院，仲叫朋友揸車接送。啱啱生完BB嘅杜雯惠，睇嚟精神唔錯，馮仁昭見佢抱住B仔不停咁笑，而陳錦鴻亦不時望吓老婆望吓個仔，然後笑咪咪咁，真係睇見都戥佢哋開心。
馮仁昭問陳錦鴻幫BB改咗名未，佢笑笑口話未，之後佢朋友部車嚟到醫院門口，杜雯惠將BB交畀上咗車嘅菲傭後，陳錦鴻雖然都有小心翼翼扶佢老婆上車，但見杜雯惠又㩒車門同車頂，好似好辛苦，睇嚟都係生完後體力未完全恢復；而佢哋上車後仲同馮仁昭揮手拜拜，心情勁靚。