早幾個月，港股勁旺，唔少網友忍唔住，話要炒老闆魷魚專注炒股。大陸股市更加熱烘烘，想辭職全身投入股海嘅散戶就更加多。不過，老公辭職炒股，搞到老婆好閉翳，話好有壓力。
網友南方青青草就係其中一個，佢話：「今年2月，老公嫌公司人工加得少，劈炮唔撈，日日喺屋企，用一萬蚊積蓄上網炒股。老公冇嘢做，自己又搵得嗰4000蚊，每個月計埋租金等嘅生活開支，冇咗一半。自己每日晨早六點幾就返工，放工返屋企仲要洗衫煮飯；相反老公只係做嗰4個鐘，3、4點收市後就抱頭大睡。眼見啲朋友結婚後有老公養，自己老公咁嘅樣，個心好痛，連親戚都唔想見。」
冇借錢去炒算好彩
深圳Shi好同情佢，「打工做嘢好緊要，咁生活先至踏實㗎嘛！炒股呢家嘢，個市好嘅時候都可以玩吓，但點都唔可以當做終身職業，加上你老公嘅本錢又唔係多。」
小壽亦話：「你老公梗係財迷心竅！牛市時係人都想炒股賺錢，但點都唔可以辭職炒股，我身邊夠有個同事半年內5萬蚊變10萬銀，咪又係好好哋打番份工。」
默默等待就教路話：「喺呢個咁瘋狂嘅牛市，你老公冇借錢去炒股，已經好好彩。」
充公股票迫佢搵工
Seekbao就醒佢：「要佢將所有錢買晒優質股，然後放喺你度，唔理升定跌，要老公即刻搵工，如果唔肯就同佢離婚。」
要打仗了就畀個希望佢，「如果你老公炒股好好彩，每年都升一倍，話唔定8年後會賺到256萬呢？」炒股都係一門專業，就好似啲基金經理咁，但要睇你對個市有幾了解同本錢有幾多，好似南方青青草個老公咁，就應該自量吓！
http://cache.tianya.cn/publicforum/Content/stocks/1/280605.shtml