幾經波折，中國女電王李小琳終於心願達成，以兩頭馬車雙線發展佢嘅電力王國，除咗喺中國電力國際呢間五大電力公司之一揸弗，李小琳仲做埋東成控股主席，全力進軍環保電力市場，女電王呢個名真係當之無愧。佢今日仲見記者講吓大計㖭。
早前中電國際阿媽入股東成兩成股權，李小琳同佢嘅副手趙新炎前排入咗東成做董事，上個禮拜五東成大股東主席黎亮直情讓位，自己做副主席兼行政總裁，掌舵主席位留畀李小琳。東成仲會改名做中國電力新能源發展，第二大股東嘅代表做主席，連公司名都改到為第二大股東嘅附屬，唔使講到明，都知道未來東成嘅發展啦，東成轉型再生能源。改名後仲會唔會繼續賣金龍船西餅先？
瓣瓣都做吓嘅東成控股，業務有地產、金龍船餅店、酒店顧問同貿易等，上年染指埋新能源呢瓣。而李小琳進軍環保電力呢個目標，一直路人皆知，佢本來諗住孖住Ba叔陳達志大搞，上年仲策略入股Ba叔揸fit嘅中科環保電力同中國環保電力，大展拳腳，點知臨埋門，阿Ba叔俾廉署請咗去飲咖啡，李小姐一額汗，即刻當機立斷，取消入股中科環保嘅交易，劃清界線，總算有驚無險。
兩頭馬車雙線發展
家吓女電王鋪好咗發展環保電力呢條路，以後中國電力會主力經營較賺錢嘅項目，包括火電及水電等常規能源；中電新能源就會主力發展再生能源，研究吓用風力發電、生物質能甚至用垃圾發電咁，實行雙線發展，女電王今勻仲唔叻晒？仲威過大佬㖭，佢嗰位都係鍾意搞發電嘅大佬李小鵬，亦只係得華能國際一個地盤，點夠阿妹有兩個地盤咁叻？不過，若計公司市值，李小琳兩間公司加埋都係得178.6億，比起大佬間公司值成245億，仲有一段距離，似乎女電王仲要加把勁至可以全面贏到大佬。
[email protected]