利物浦守門員連拿（Reina）只得二十四歲，但已經半禿頭，睇落年紀唔似二十四歲。連拿喺射十二碼時，撲出車路士羅賓與謝拉美嘅十二碼，成為贏波英雄：原來佢在西班牙時已經以撲救十二碼出晒名，利物浦領隊賓尼廸斯買佢去利物浦，就係睇中呢點，更何況賓尼廸斯識得連拿老竇呢？老連拿喺一九七四年歐冠盃決賽就係馬德里體育會守門員，撲救唔少險球，逼和拜仁慕尼黑，重賽時就以○比四大敗，故此連拿守龍門有遺傳㗎，自小就由老頭子訓練。
利物浦贏波之後，連拿歡喜到極，返到屋企，見到佢架心愛「波子」被賊佬燒咗，家中珠寶首飾及一套B&O音響電視系統唔見晒，為之愕晒然，但仍然掛住老頭子，希望佢能夠去雅典睇決賽。利物浦球員家中被劫，並非新聞，啲賊公專係吼住利物浦踢波之時，去入門行劫，譬如高治、艾加、杜廸以至曼聯朗尼父母間屋都被打劫過。其中以杜廸最傷心，因為啲賊搶走佢嘅波子、珠寶之外，仲攞走佢喺二○○五年贏到嘅歐冠盃冠軍獎牌，你知啦，自嗰場之後，杜廸雖然撲救十二碼有功，但被貶為後備，冇份出場嘞。
連拿父親未贏過歐冠盃，佢仍有希望，故此好希望老頭子去雅典。但老連拿患上神經過份緊張症，每次睇個仔打波，就緊張異常，跡近崩潰，睇其他人踢波就冇乜事喎。上次老連拿去利物浦睇燕豪芬，係因為知道首回合利物浦已經贏咗三比○，次回合打風流波，冇晒緊張氣氛，先至肯入場。天下父母，睇仔女打波，無不緊張，但緊張到老連拿咁，十分少有。最近NBA季後賽，火箭隊姚明表現甚佳，姚明父母喺場邊觀戰，唔知係唔係中國人特別含蓄呢，兩老甚少表情，只係見到佢哋有時緊握拳頭而已。如果講到上陣不離父子兵，就係AC米蘭嘅馬甸尼，呢位老將以前為意大利國家隊出征，教練就係佢老頭子。巴塞隆拿嘅古莊臣初入冰島國家隊嗰陣，如果唔係老頭子有傷，父子會一齊上陣㖭。