花旗公布嘅就業數據麻麻，上個月嘅新職位創兩年半新低，經濟增長睇嚟會繼續放慢，咁係好消息定壞消息？點睇都唔似係好消息，不過花旗股市話知你，照升。
雖然花旗個市升咗好耐，經濟又有隱憂，通脹又話有威脅，好多人都話要小心啲，但係實際嘅情況就係，美股升咗咁耐，累積嘅升幅唔算離譜，同祖國股市比，真係小巫見大巫，如果話股市下跌嘅幅度可以用時間拖長嚟收窄，咁樣掉番轉頭嚟睇，美股嘅升勢其實好合理，仲可能有排升。𠵱家花旗嗰邊擺明要推個市上去，併購消息一浪接一浪，升勢唔會咁快停。
呢個禮拜港股要面對好多消息，即係話有好多變數，不過，睇番成個局，仍然可以審慎樂觀，除地產股外，油價係咁跌，航空股都可以留意吓。
中電信C輪7705：中電信（728）上禮拜五以3.90元收市，升破橫行區，會上試4.10元，破位就睇4.50元，買盤幾勇，可以諗吓中電信C輪7705，𠵱家做42仙，槓桿率9.3倍（有效5.4倍），正股升到4.10元同4.50元，7705應該唔會低過54仙同82仙，正股跌穿3.70元止蝕。
俊 樺