中旅（香港）（308）係中資股，亦係基金股，基金揸中旅，睇好中國旅遊市場前景係其中一個理由，而中旅今年內會有連串大動作，包括重組、注資同分拆，係基金對中旅鍾愛有加的另一個理由。
兩大理由，已夠「料」睇好，但上周五又有新「料」，話中旅業務同股權好快會「國際化」，消息來源好可靠，亦好具爆炸性，若然成事，股價肯定會有強烈反應。
中國市場咁大，冇一個財團唔會憧憬，消息就話有一個國際性主題公園集團要打入中國龐大嘅旅遊市場，分一杯羮，合作對象就睇中中旅。外商好有誠意，除合作外，更想入股，雙方「拍埋」，對長遠的業務發展好有利，外商可藉中旅進軍神州，中旅亦可借此走出去，所以，入股成功機會應幾大。中旅一引入外商策略投資者，評級提升，股價亦會爆炸性上升。
成交大增動力轉強
中旅股價上周五升勢再起，高收3.53元，升0.16元，升幅4.7%，成交亦大增到5100多萬股，係過去4個交易日平均數的四倍，動力轉強，股價已重上10日、20日同50日條平均線之上，一升破由2月開始的大型上升三角形阻力（3.90元），量度上升目標指向5.50元。
內地去年全年旅遊產業收入近9000億元，破晒紀錄，今年肯定會衝破1萬億元大關，明年奧運年，增長仲勁，多間大行報告都指奧運概念係今年投資主題，中旅係內地旅遊嘅龍頭公司，受惠自然亦最大。
中旅重組，第一步係出售非核心的渭河電廠，集中發展高增長及高回報的旅業；第二步係注入北京多間酒店及招商國旅；第三步係分拆芒果網。另外，中旅集團3代公司的併合，時機亦已成熟。
芒果網係全國第3大旅遊網，已與3500多間中港澳酒店建立合作關係，3大之一的「攜程」早年上市，股價大升，芒果網一分拆，中旅股價又會增添新動力。