弘海公司（8112）連續大升兩日，噚日高收1.39元，升0.41元，升幅41.8%，大升榜中排第2位。
去年12月底，推介弘海，當時股價0.94元，話佢細細粒轉型，可憧憬，其後股價沉咗一輪，到近3日先發力，由0.80元起步，一升就75%，3日成交分別係390萬、708萬同1550萬股，大升而成交唔多，有兩個理由，一係揸家惜售，另一就係貨源歸咗邊。
股價大升，主要係有「春江鴨」入市，而且買得好急。公司有消息，一個係月中會做「路演」，另一個係進軍礦業可能有新發展。
弘海去年中易主後，注入製造包裝袋業務，業績持續有進展，提供穩定及高增長的收入。06年（12月年結）的上半年，公司虧損306萬元；首9個月已轉盈，賺302萬元；全年則獲利1010萬元，即注入包裝袋業務後，第3季同第4季分別賺608萬元及708萬元。由於定單增加，今年表現會更理想。
進軍礦業或有新發展
弘海發行唔夠3億股，股價大升後，市值仍只係4.2億元，係細細粒嘅轉型股，睇大盤入貨之「猴急」，股價升勢應仲係起步階段，弘海有包裝袋業務每年提供3至4千萬元盈利，又有進軍礦業概念，中線股價應可見2字頭。
港股又再創新高，恒指最高升穿21000大關，報21070，大升229點，收20896，升55點，成交再增至679億元，單係中石油（857）已佔88億元。大旺市日日有幾百隻股份上升，日日豐收。
上周末推介世紀陽光（8276），噚日股價大升，搶到上2.20元收市，升幅16.4%，成交更大增到約5100萬股，係3個月以來的高紀錄，走勢現突破，中線仍可以2.60元為目標。
中旅（308）有基金盤對撼，最高3.61元，收3.52元，跌1仙，有外商想入股，相信成事機會頗大，要繼續留意。
早前推介寶威（024），當時股價0.76元，噚日最高升上0.98元，升29%，收0.94元，可先獲利，調整後再吸入，中線看好。