「無厘頭笑匠」周星馳與潮人指標陳冠希（Edison）原本風馬牛不相及，但近日二人卻成為拍檔，原來Edison將會在星爺的gi商場開設時裝店，兩人更聯手為該商場設計了一件諧音粗口Tee，一於要令這個商場潮爆香港。
陳冠希向來視周星馳為偶像，每次有星爺的電影推出，他必定會捧場，單是《少林足球》及《國產零零漆》等電影便重看了四、五次以上，所以他一直期盼有機會能與星爺合作拍戲，沒想到二人結片緣前，先在生意上合作。日前記者直擊星爺帶着Edison現身其加連威老道gi商場看舖位的過程。gi商場乃星爺於04年以2.1億港元買入，商場店舖主打潮流文化，難怪Edison會看中此地開店。
現場所見，星爺似乎相當重視潮人Edison到其商場開舖一事，只見他陪着對方看地下一個舖位，兩人一輪指手畫腳後，Edison便不斷點頭，與商場負責人交換了名片，星爺又帶Edison參觀整個商場的環境，逗留約20分鐘後，便各自乘車離開。
無懼非議
「唔擔心，諧音啫」
事後記者致電陳冠希查詢，他承認本月底會在星爺商場開舖，但不是為自己的時裝店Juice開九龍分店，新舖主售潮流產品，主打為他旗下品牌Clot為該商場設計的一系列最潮產品，為了搞搞新意思，Edison和星爺合作設計了一件T恤，衫上印有粗口諧音「三分鐘搞檸掂」中文字，十分搞鬼。Edison說：「今次選擇喺嗰度開舖，係想試吓同星爺合作，睇吓專門為呢個商場設計啲嘢嚟賣會點樣？不過個合作形式係點都未傾好，下個禮拜我同星爺嗰邊會再傾一次，落實啲租舖條件後，估計間舖應該月尾可以開得。」
問Edison可擔心推出粗口Tee會被外界非議？他說：「唔擔心，諧音啫！又唔係真係用粗口字句，件T恤仲未定價錢，要再同星爺傾傾。」記者問二人在生意上有交流後，會否合作拍戲？Edison說：「如果可以拍到星爺導演嘅戲，對我嚟講簡直係個夢，以前我未拍過喜劇，唔知同星爺呢啲要求咁高嘅導演合作，會唔會有好大壓力。」
大讚聰明
「佢哋先係主腦人」
其實星爺近年在地產界大有斬獲，他在女友于文鳳協助下，不斷買賣以億元上落的商舖和地皮，gi商場則主要是用來放租，今次他與Edison合作，明顯是希望借助對方的潮人形象，令該商場成為潮人集中地。星爺昨日接受電話訪問時說：「其實租舖嘅嘢我好少理，只不過嗰日Edison想嚟睇舖位，咁我有時間咪陪佢睇吓，細則都係要下邊啲人同佢傾。」
問到星爺有否參與設計Edison為商場推出的粗口Tee，他說：「其實落手落腳都係Edison佢哋搞，佢哋先係主腦人，出呢啲T恤都幾得意。我覺得Edison幾聰明，拍喜劇都可以，如果將來有啱嘅角色，我同佢都會有機會一齊合作拍戲。」
採訪：魯萍
攝影：陳志嵐
最高蘋嬸
蘋嬸其實想睇到潮人陳冠希同星爺合作拍戲多過聯手搞生意，因為以前都未睇過Edison做喜劇，唔知佢同星爺一齊會唔會有火花？
蘋果娛樂特派評述員蘋嬸
