「孖寶兄弟」最鍾意食菇，食咗之後會變大，通行無阻，仲可以踩低怪獸……雖然人類食咗菇唔會變大變超人，但其實各種菇菌都有降膽固醇、防血管硬化、抗癌等療效，個人健康啲，行步路都醒神啲！今日教大家以菇菌煮幾味，滿足口腹之餘亦有食療價值，大人細路都啱食。
記者：趙珮倩
攝影：何家亮
示範：日航酒店桃李廳（27391111）
中菜部總廚蘇栢奇
韭黃本菇炒螺片
需時：20分鐘
價錢：$70/4人
材料：韭黃2両、本菇/螺片/西蘭花各4両、鹽/糖各1/2茶匙、雞湯1杯、蒜茸/薑/甘笋片各少許
做法：西蘭花/本菇汆水，以雞湯煨入味備用；螺片汆水至熟備用；西蘭花以鹽/糖炒熟伴碟；蒜茸/甘笋片/薑起鑊，下螺片/本菇炒熟，最後加入韭黃兜勻即成。
知多啲：本菇含豐富纖維、低脂利便。食落有口感，用來炒、扒、焗樣樣掂。
龍蝦雪耳薏米鮮百合帶子炒鮮奶
需時：50分鐘
價錢：$100/4人
材料：龍蝦8両、雪耳1両（已浸）、薏米（已浸）/鮮百合/帶子各2両、鮮奶150毫升、雞湯70毫升、鷹粟粉1両、蛋白4隻、鹽/糖/雞粉各少許
做法：先將雪耳/薏米蒸半小時；龍蝦拆殼，起肉走油備用；雪耳/薏米/鮮百合以雞湯煨入味備用；將鮮奶/雞湯/鷹粟粉一起拌勻，加入蛋白/鹽/糖/雞粉攪勻後落油鑊，下龍蝦/雪耳/薏米/鮮百合/帶子快炒至蛋白呈熟即成。
知多啲：雪耳含豐富維他命D，能防止鈣質流失，此外也含硒等微量元素，有助增強身體抗腫瘤的免疫力，可防癌抗癌。
鮮茶樹菇蘆笋桂花蚌
需時：20分鐘
價錢：$70/3人
材料：茶樹菇/菜心各4両、蘆笋苗2両、桂花蚌8両、蒜茸/葱/薑/甘笋片各少許、鹽/糖/蠔油各1/2茶匙、雞湯1杯
做法：先將茶樹菇/蘆笋苗走油，然後煨雞湯至入味備用；桂花蚌汆水滾熟備用；菜心汆水，下鹽/糖炒熟伴碟。蒜茸/葱/薑起鑊，將茶樹菇/蘆笋苗/桂花蚌/甘笋片炒勻，下鹽/糖/蠔油調味即可。
知多啲：茶樹菇有清理血管、降膽固醇、抗衰老及去水腫等功效，用來炒煮、煲湯皆宜。
花旗參石斛松茸燉花膠豬𦟌湯
需時：4小時
價錢：$250/4人
材料：花旗參1両、石斛1/2両、松茸2両、花膠6両、豬𦟌8両、鹽/雞粉各少許
做法：先將花膠/豬𦟌汆水，松茸預早浸腍備用；將所材料放鍋內，加入1200毫升水燉大約4小時，最後下鹽/雞粉調味。
知多啲：松茸有「菌中之王」之稱，香味獨特濃郁，用來燉湯，越燉越有味，口感爽脆，即使燉幾個鐘都唔會爛。據日本研究發現，松茸含有26種氨基酸及維他命B，滋補養生，對抗癌亦有療效。
路邊野菇不要採
雖然食菇菌有益，但一些生長在郊野的野菇可能含有天然毒素，經煮熟後也無法全部去除，進食了可能引致急性食物中毒，嚴重可致肝、腎衰竭甚至死亡，所以記住路邊野菇不要採摘食用。此外，如發現菇類有變壞及表面有色斑或異味，也不應購買。