上星期三邵氏（080）股價急升12%，翌日即有報章財經新聞頭條報道話，有買家擬以每股25元至27元洽購邵氏股份，股價再升多15%至20元。不過到咗中午即見公司發表聲明嚴正否認有關報道，股價又打回原形。其實邵氏話有機會被看中手上優質資產已經講咗好耐，不過若然有人為咗炒高股價而亂放流料，就太唔應該。
上周五廖創興企業（194）股價亦見異動，呢間持有創興銀行（1111）嘅控股公司，持有大量物業投資，包括旺角創興廣場、西營盤創業商場、滙港中心、寶翠園10%權益及淺水灣低密度洋房等，另在國內亦有商住發展項目，不過佢每次炒上，都係傳出售創銀，而非價值重估。此股由於平日成交偏低，一係就悶死人，升嘅時候就追極都買唔到貨，係長線捧場客至賺到佢錢。
其士科技配股或有後着
其士國際（025）上周五宣布，以先舊後新方式配售2538萬股其士科技（508），每股作價3.70元，比停牌前明顯折讓14%，但其士科技復牌即急升，收市升26%。是次集資約9160萬元，用作一般營運資金，配售代理係星展，唔係乜嘢大行，亦都無話引入啲乜嘢名牌基金，配股畀幾名投資者唔知係乜水，然而宣布集資卻可以令股價升咁多，莫非真係憧憬集團將餐飲業王國進軍中國大陸？
其士科技自從收購太平洋咖啡及出售科技業務予母公司後，已正式變身餐飲股，去年宣布轉型後亦已錄得逾倍升幅，經大半年在3元水平橫行之後再炒上。正常為集資而配股嘅股仔多數係先炒上後配股，但係今次反而配股後再炒上，或有後着都未定。