結婚除咗可以增添生活情趣，原來仲可以致富。
美國俄亥俄州立大學人力資源研究中心專家扎戈爾斯基嘅調查發現，一個人結婚15年後，身家可能係單身人士嘅兩倍，因為夫妻一齊負擔生活開支，比兩個單身人士慳更多錢，從而產生「規模經濟效益」。有網民喺《MSN討論區》問：「點樣可以同有錢人結婚？」
做義工釣金龜
itsagreat2day教路：「女士們想釣金龜婿，就應該改善儀容，談吐舉止要夠高尚；要睇多啲書去增加內涵修養；唔好做粗重嘢，以免做到隻手粗晒。亦可以參加義工活動，留意邊個人經常捐大把錢，然後乘機結識佢哋。」
judyfishgeek話：「男士們可以加入遊艇會，乘機同遊艇上面嘅單身女士跳舞、食飯、玩啤牌，然後發展感情。市面上有唔少書教人點樣搵個有錢人結婚，大家不妨參考吓。」
libra007講：「富家女通常鍾意嫁富豪，至於年紀接近50歲嘅富婆，通常唔會吼嗰啲後生又冇乜錢嘅男士。」standup3話：「男富豪就相反，通常寧願娶個年輕貌美嘅女士，而唔會同年紀較大嘅富婆結婚。」
judyfishgeek講笑話：「一個人為愛而結婚後，第二次結婚通常係為錢；如果第三次結婚，仲可以使埋第二任配偶留低嘅財產。」
小心搵錯被呃
PrincessLeia反駁：「嗰啲為錢結婚嘅人，小心俾人呃，婚後可能捱得好辛苦。我懷疑我外母係貪外父有錢，所以嫁畀佢，但佢哋𠵱家冇乜錢剩。」
幾年前嘅美國總統候選人克里（JohnKerry），先後結過兩次婚，老婆都有錢過佢，所以有人戲稱克里係「掘金者」。