無綫前高層黃家亮疑因患抑鬱症吊頸自殺身亡，一眾黃家亮的昔日同事昨聞其死訊均大表震驚。與他共事多年的港姐保母陳紫蓮在公開活動上忍不住淚灑當場，江欣燕則表示對方一手發掘其扮嘢天份，對此悲劇感到惋惜。
無綫一眾台前幕後昨日得悉黃家亮疑因患抑鬱症而自殺身亡後，均大表惋惜，外事部高層曾醒明表示黃家亮妻子林曼玲為無綫職員，事發後已申請休假。跟他昔日共事多年的監製林嘉穎及何小慧等則會協助辦理身後事。
李添勝無限感慨
曾與黃家亮合作多年的港姐保母陳紫蓮（Rosa）和向海嵐，昨日在尖沙嘴出席慧妍雅集25周年晚會記者會，她們對黃家亮輕生均大表惋惜，Rosa更忍不住淚灑現場，她說：「我有聽聞佢有呢個病（抑鬱症），有叫佢睇開啲、開心啲，不過件事都係好突然，我同佢合作咗港姐好多年，佢係一個工作好盡力嘅人。」向海嵐則說：「佢個人好nice、好盡責，或者係一時間睇唔開啦，呢行壓力好大。早排我有少少家事煩，工作又好似唔係好順利，就大喊咗兩場發洩，抒發晒就乜事都冇。」
至於當年被黃家亮一手發掘扮嘢天份的江欣燕，昨日在將軍澳電視城表示與他相識逾20年，她說：「《歡樂今宵》年代，佢有份發掘我做Maria，半年前都有同事約過成班人一齊出嚟食飯，不過當時我有工作在身，希望佢屋企人可以度過呢個難關。」
至於監製李添勝也對黃家亮的離世表現得無限感慨，他說：「今朝返工見到何小慧話佢走咗，我仲問走咗去邊度做，見佢眼紅紅我先意會到。佢做助導時已經睇住佢，後來我就調去戲劇科，聽到呢啲消息好唔開心，印象中佢係一個好實事求是嘅人。」
發哥：病向淺中醫
當年在無綫拍過不少劇集的周潤發昨日在電話中說：「我同佢喺TVB共事過，嗰時佢係編導，而我喺戲劇組。」有指黃家亮患上抑鬱症，他說：「我想呼籲香港人唔好畀自己太大壓力，有壓力就應該搵精神科醫生，中國人好怕畀人話有精神病，其實呢啲同傷風感冒差唔多，食吓藥就冇事。」
蘇玉華昨日在尖沙嘴拍攝劇集《和味濃情》，對於黃家亮死訊感到非常突然，她說：「我同佢合作過，覺得好可惜，呢個病（抑鬱症）好可怕，有呢個病嘅人應該及早就醫，同身邊人分享。」
採訪：顏英儀、卓美娟
攝影：陳志嵐、陳偉
