「有得揀，你至係老闆！」咁你寧願做老闆，定係𢭃份糧、做個位高權重嘅CEO（行政總裁）？
《華爾街日報》網上版一項調查發現，有份投票嘅3400人之中，74%都寧願做小型私人企業嘅老闆，只有26%想做上市公司或大企業嘅掌舵人。何解？
amitkhemka喺討論區度話：「有啲人從低做起，一直力爭上游做到CEO呢個位會覺得好滿足，但有啲人會覺得靠自己雙手創一番事業先夠過癮。」
gracerenshaw好認同話：「我自僱15年，雖然唔算好有錢，但勝在生活舒適，可以完全控制自己嘅作息時間，無論生意好壞都唔需要同人交代，唔使諗點樣取悅股東嚟保住自己個飯碗。唯一唔好係『手停口停』，放大假冇人會出糧畀你﹗」
做CEO着數多
romesh就認為要視乎間企業有幾大：「開一間獨立小企定連鎖店有好大分別。自己開舖，賺蝕都要獨自承受；喺巨企做CEO都係打份工啫，就算間公司就嚟執笠都唔關你事，人工照𢭃、福利照享。」
難怪NedMcDonell話有得揀一定要做大企CEO，仲話稱職嘅CEO最緊要識得運用以下伎倆：
1.厚酬顧問工作留畀老友
2.粗重嘢畀「奴隸獸」做
3.娶埋個靚女秘書做老婆
4.出售賺錢業務谷大利潤
5.搵會計師執靚公司盤數
6.偷人條「橋」都唔慚愧
7.請「應聲蟲」附和自己
8.搵公關將自己見解出書
佢仲話：「做小企老闆，如果經營不善，最終可能一無所有，但係國際知名嘅大企CEO就唔同，就算間公司毫無起色，我一樣可以拎數以億計嘅酬金走人，臨走前仲可以同人講『我要去追求個人理想』，不知幾瀟灑！」