單車已逐漸成為潮流的一部份，很多品牌都以湊熱鬧形式出部型仔單車贈興。但生產單車豈如車兩口線整件Tee般簡單兒戲，一架功能與外形兼備的單車更談何容易呢！所以PUMA舊年醒目地邀請得丹麥著名單車廠BIOMEGA合作推出首部單車。今年第2回添食，更加入8個速段轉波系統以增強其內在美。今日黎諾懿決定親身上陣，測試呢架外形與內在兼備的URBANMOBILITYBIKE。
記者：許維雅
攝影：陳偉強
服裝提供：PUMA
黎諾懿：外遊大發單車癮
4歲開始學踩單車，至少年時代聯群結黨踩架單車周圍去的黎諾懿，不可稱得上甚麼單車專家，但每當有機會去外地工作旅行，都必會租架單車四圍去，可算係單車發燒友一名。初次接觸PUMA×BIOMEGA的8-SpeedURBANMOBILITYBIKE，他極之讚歎單車外形夠晒靚仔。再發覺有8段波速轉波之後，就大讚轉波十分快、又順又方便，不會像舊式單車般「卡卡聲」和斷鏈的情況出現。黎諾懿：「佢將轉波齒輪收晒入後轆鐵箱，好似波箱一樣，夠晒亁淨！加上佢用雙碟式煞車系統，感覺就好似將電單車嘅嘢搬晒落架單車度。如果下一代可以改埋用腳轉波，感覺會仲型仲正！」
黎諾懿雖然喜歡踩單車，但為怕狗仔隊追訪，在香港好少踩。「真係有記者跟！都唔知掉低架單車好，定繼續畀佢哋影？所以寧願一有機會去外國先踩！」
聞價即閃
其實每個人一見到呢架URBANMOBILITYBIKE，都被它的外形吸引，眾人測試都顯得十分熱烈。每個人試踩後，大部份都有讚冇彈。全部人心感興奮之際都例必有興趣地問價錢，不過，9成人一聽$12,000，個個都立即變臉。
阿卓：「我係單車發燒友！一望呢架單車就覺得好吸引！試踩後覺得架車啲鋼水好靚，轉波、鎖車都好方便，無論內外都係一架設計好好嘅單車，唯一係覺得價錢過份咗啲！」
Kenny：「架車嘅用料同設計都近乎完美，係個seat位太窄太長，唔係咁好坐，踩得太長時間會唔舒服！」
Ben：「架車外形吸引，後生仔一定鍾意，試踩後亦覺得好好踩！略嫌車身較重，雖然有得摺埋，但搬上搬落始終唔係咁方便！」
Chris：「好勁！佢嘅轉波系統好順！有8段波速咁多，行咩路都得！外形都十分討好，係價錢貴啲！個價錢買架二手車都得喎！」
石仔：「初初以為架車冇得轉波，真係估唔到佢收埋晒轉波啲齒輪喺波箱度！好勁！個樣又靚仔，真係幾想買！」
多功能完美第2代
第2代外形跟第1代的改變不大，同樣有如PUMALogo美洲豹的流線外形。往年的黑豹換上今年的紅豹及銀灰豹，款式的確十分討好。由BIOMEGA首席設計師JENSMARTINSKIBSTED親自操刀，用上輕身的鋁合金製造，將單車最先進功能放入這架紅豹之內，如碟煞鏈餅、綜合式鋼線鎖、半摺合式及24"特大輪胎等都一概保留。為加強第2代功能，加入了日本Shinmano出品的ALFINE8段轉波變速波箱，令單車在不同路面、斜度的道路上踩得更輕鬆。
全方位測試
入彎：「一般摺合式單車都會出現入彎不穩的情況，呢架單車可能屬於半摺式，加上個轆夠大，所以入彎都好穩定。」
花式：「雖然我唔係咁識玩花式單車，但我估用呢架單車玩花式，會略嫌重身！」
凹凸不平石路：「其實行石路就應該好似斜路一樣用1波，轉咗1波之後，成架車真係輕晒，感覺差好遠，所以踩石路都好舒服，問題不大！」
摺車開合程序：「一個制式嘅摺合程序其實都好方便，係開頭整嗰陣時有少少困難，摺多幾次就應該冇問題！」
高速直路：「試用8波高速踩直路，車身即刻變得好重身，所以好順暢之餘，踩得咁快亦感覺好穩定！」
同場加映單車鞋
PUMA同期亦推出不少同樣以單車作主題的服飾，最新有PUMASacramento的Dasslerinspired波鞋，用上不同搶眼色間襯在白皮或網面之上，配合夏日之餘，修長的外形亦明顯攻打女生市場。
店舖查詢：
PUMA專門店（31050991）
九龍塘達之路80號又一城L1-09舖