中港兩邊飛唔停嘅修身堂靚靚老闆娘張玉珊（Shirley），上個禮拜同好耐冇見嘅傳媒朋友食晏，佢話坐飛機多到連港龍空姐都話冇佢飛得咁密喎。𠵱家祖國市場發展一日千里，內地客又捨得使錢，有咁多豪客，梗要睇緊啲內地盤生意啦。
飛得咁密，Shirley啲皮膚仲好似剝殼雞蛋咁滑，佢不忘賣花讚花香，一邊話用修身堂自家品牌，另一邊就讚內地分銷嘅SK－Ⅱ好用，大讚推出冇耐嘅「雙面膜」好到不得了，簡直就係一個人肉生招牌，真係連代言人都可以慳番。
對於早前有傳聞指Shirley俾契媽方逸華欽點，接棒陳志雲做收費電視節目主持，佢話𠵱家都仲傾緊，不過，就算成事，都唔會訪問政經名人㗎喇，因為對政治一竅不通，反而會諗教吓老本行──扮靚。佢又話打理修身堂已經忙到不得了，都未知時間點安排。
[email protected]