強國人民出名手工叻，唔外傳嘅絕技係化腐朽為神奇，或者化神奇為腐朽，A貨LV大家見得多，原來成個廸士尼樂園都可以老翻。呢個A貨「Dismeyland」喺北京，八方冇去過，老友send條YouTube短片嚟睇，A貨樂園明刀明槍，門口有句slogan：「去廸士尼太遠，來石景山遊樂園」。
日本電視台踢爆
近日有日本電視台去到石景山遊樂園玩踢爆，發現裏面超多爆笑位，原本遠遠望埋去嘅偽冒睡公主城堡，攞嚟做布景板都呃得吓人，但一入場就有古怪，皆因花園有幾隻甩色賓尼兔，好多同胞喺草地上攬住件綠色嘢唔放，睇真啲先知原來呢個「A貨廸土尼」連隔籬台夢工場嘅史力加都唔放過，整隻畸形版大家望梅止渴。
A貨抄足正版都有大巡遊，但似「妖獸出籠」多啲，首先撲出係鬥雞凸眼、生胙腮嘅小矮人，後面仲有猥瑣版高飛狗同村姑look白雪公主，最騎呢係crossover埋鬈鬚HelloKitty同扁頭叮噹（唔敢話係多啦A夢），連國寶級嘅熊貓都有出場，環球卡通人物大雜燴一鑊熟。
「跳跳虎」向人收錢
遊客入到主題公園影相拍片好平常，但啲演員好唔專業，不時除低頭套唞涼，有隻大耳樣衰「跳跳虎」，仲擋住鏡頭話唔畀roll機，畀咗5蚊人仔先准影。場內攤位遊戲都好出位，獎品係變色又變形嘅類似米奇同米妮物體，仲有暴肥版小熊維尼。
據遊樂園網站資料，「A貨廸土尼」佔地逾33萬平方米，聲稱每年有150萬人次入場，入場費連機動遊戲套票最平百幾蚊人仔。導遊friend同八方講，呢個場主要做內地客，所以香港冇乜人去亦冇乜人知，佢都係得個知字。今次俾人踢爆，再經YouTube宣揚，短短幾日已經有幾十萬網民睇過，中國再多一樣傑作，全球知名。
