日本有個電車男，北京就有個「單車男」，絕對真人真事唔係改編，佢3月30日開始由北京天安門出發，直踩天津、南京、上海、廣州、深圳，一日踩8至10個鐘，踩爆咗幾條胎，噚日終於踩到嚟香港。
單車男叫張旭，今年24歲，從事IT行業，山長水遠踩單車嚟香港，唔係為咗挑戰世界紀錄，而係懷念亡父嘅一片癡情。佢話爸爸97年同佢講，香港回歸後好想兩仔爺一齊遊香港，點知爸爸喺98年意外過身，佢就趁香港回歸10周年踩單車南下香港，了咗父親呢件心事。張旭話，逗留香港兩日期間，會去旺角、尖沙嘴自由行，之後就返北京，回程搭飛機，唔踩單車。八方祝佢一路順風，咪俾黑店劏。