你嘅身體喺你未出娘胎已經跟住你，親密過任何人，但睇完一本叫做《WhyDoMenHaveNipples?》嘅生理常識書，發現對佢原來唔清唔楚。不過，本書同樣亦有好多道聽塗說嘅民間秘方，所以搵埋陳諾偉醫生嚟解說，補充吓急症室醫生BillyGoldberg寫嘅嘢，一次過解釋有趣生理常識嘅疑團。
記者︰劉昱蘭
攝影︰陳陶鈞
Models︰Rainbow、Nichole、Wilfred（IG綜藝社群）
會!條件係當陰莖處於勃起嘅狀態，遇到突然嘅重創或者屈曲，充咗血嘅陰莖海綿體，雖然係厚纖維物質，但真係會裂開。陳醫生話本書解釋得好正確無異議，呢個情況最常見發生喺激烈嘅性行為，遇有呢啲情況，一定要急救唔可以拖，如果唔係日後就有性障礙㗎。
2.點解男人有乳頭？
喺媽媽體內嘅頭6個星期，男仔同女仔嘅胚胎發展係無分別，過咗呢段時間，男性嘅染色體先開始做嘢，所以男人保留咗乳頭乳腺，然後再開始發展男性嘅特徵。
3.忍住唔打噴嚏會視網膜脫落？
原來打噴嚏打出嚟嘅氣，最盡可以去到每小時160公里咁快，咁大嘅力度，如果你忍住唔打出嚟，本書話會引致視網膜脫落、爆微絲血管、爆耳膜、耳水不平衡、流鼻血……死狀甚慘。陳醫生話理論上佢都啱嘅，但點樣可以憑2隻手指壓住個鼻，可以抵擋到咁大嘅氣呢？所以實際上都無乜可能會咁樣慘死嘅。
4.男人着緊身底褲無仔生？
本書話有個研究要一半男人着Boxer，一半着緊身三角褲，然後量吓佢哋嘅睾丸溫度、精子嘅活躍度同數量等，兩批人都無分別。陳醫生睇過咁多調查，話兩者有分別同無分別嘅佢都見過，所以其實都好睇佢個研究過程係點樣做，先可以講到本書可唔可靠。不過唔講啲Research，醫生都係建議大家着闊身啲會好啲，一定唔會因磨擦令睾丸升溫精子不適，而且又一定舒舒服服。
5.食過量個胃會唔會爆？
書內講咗一個案例話有個49歲男人因為食得太多，個胃真係爆咗兼死咗喺公廁。
陳醫生就有啲懷疑個案例嘅來源，會唔會只係一啲小道消息，或者個男人本身有胃病？因為胃本身好有彈性好難爆，食物經過胃部，一係向下走排出體外，冇路去就向上推嘔番出嚟，食到爆胃可能性都好低。
6.青瓜敷眼果真去眼腫？
簡單用冰敷都可以去眼腫，但青瓜有90%係水又唔會凍傷眼，咁青瓜咁多水，凍咗敷眼就當然可以收血管去腫。陳醫生補充，急救嚟講要即時冰敷收血管去腫，1至2日後熱敷帶動血液循環去瘀，所以可以試吓冷熱輪流咁敷眼去黑眼圈喎。
7.打呵欠會傳染？
本書話呢個係心理行為因素，打呵欠呢個動作好容易令人無意識咁模仿，書亦提及以前以為打呵欠係人體想吸多啲氧精神啲，但𠵱家已經否定咗但無解釋原因。陳醫生就舉例，好似做運動咁好需要氧氣，但人唔會喺做運動嘅時間打呵欠，佢認為打呵欠係人體攰想放啲二氧化碳出嚟會合理啲，亦唔會傳染。
8.牙膏可以去暗瘡？
咪制!咁樣做可能會引起皮膚炎就真嘅。
牙膏係殺牙菌，而且佢又無暗瘡膏中所含嘅抗生素，唔係乜菌都殺到咁勁嘅。另外牙膏通常都有薄荷等刺激成份，小心皮膚過敏。
9.忍尿果真危險？
本書只係講咗點解人會有急尿嘅感覺，無直接解釋到個原因，點解無菌形態嘅尿忍得多會有害，陳醫生就話，主要係積得太耐尿先會有菌，所以成日忍住唔去廁所會易有尿道炎。
10.男人都有更年期？
有!只不過無女人咁清晰。女人一停經就等於更年期到，但男人無明顯嘅生理反應可以界定更年期，男人只會喺性慾、肌肉、體能等各方面慢慢衰退，而且每個人幾時出現嘅情況都好唔同，唔似女人個個都係40零歲左右就停經。界定唔到唔等於無，男人更年期都會心煩氣躁又易攰，都要靜心㗎。
《WhyDoMenHaveNipples?》係由MarkLeyner&BillyGoldberg編寫，內容有關人類生理上的有趣問題，由於題目好笑又有少許學術性，所以在歐美相當受歡迎。
鳴謝︰陳諾偉醫生
