微風吹拂偌大的千禧校園，輕搖粉黃色的校服裙襬。十年間，粉色調和條子抬頭，單調的藍白灰被掃進校服界的歷史，花巧的百褶裙演變成簡約的one-piece，還有代代相傳的大地牌絨褸，逐漸進化為可以隨時變身的功能型棉褸。回歸十年，港人生育率大跌，令學生數目大減，校服公司為了生存，除要在設計上下功夫，最大的挑戰，原來是加製大碼衫，應付越來越多的學生肥仔嘜。 記者：張嘉雯
「喺97年前啲人生好多個，一間學校有千幾人，班班都收到爆晒錶，一班40幾人。𠵱家殺校，得番廿幾人一班，少咗一半。」位於荔枝角道的歐美校服公司，開業20年，東主彭婉碧見證附近的學校陸續被殺，「之前周氏宗親會小學，仲有鮮魚行學校，佢哋一年班收唔夠人，我哋咪做少啲細碼囉。不過佢哋不嬲都好多插班生，開咗學先嚟訂校服。」
有家長一次買五套校服
「以前學生人數多，放學時間好多小朋友行過㗎，𠵱家少咗好多。」彭婉碧又說，以前一家多兄弟姊妹，現在獨生子女多，「啲校服唔啱着，都冇得留，惟有留喺學校，留畀啲師弟師妹。」
遇見麻煩客人一笑置之
「經濟好嗰陣，家長會手鬆啲，有啲父母一次過買五套，一個禮拜先洗一次，入嚟買嘢仲會派利是。」這幾年來，不少學生是新移民，他們一般比較慳儉，「香港土生土長嘅小朋友買親最少兩套，新移民通常夠着就算。」
相反，經濟不好時，「癲人處處」，「有啲人走嚟擺低件校褸，明明唔係我哋公司嘅，又話要攞返嚟換，我梗係唔幫佢換啦！啲人喺恒生開戶口，就走去滙豐攞錢，都係銀行啫，咁都得㗎喎！啲人搵唔到食，嚟買件衫就發洩晒，我哋做呢行都遇到好多儍人。」
「又試過有個客唔滿意，問我貴姓，之後打嚟話要投訴我態度唔好，叫老闆炒我（彭本人就是老闆），我咪同佢講我聽日唔做囉！」爆笑遭遇，長講長有，「有啲人入嚟，問有冇佢間學校嘅校服賣，我哋話冇，啲人又喺度鬧：『冇？！冇你又唔寫出嚟！』」面對這些人，做老闆的惟有一笑置之。
彭婉碧說，從前校服設計簡單，圓領恤衫加校章，再配白或藍斜褲，「以前做校服，唔係純白、灰就係藍，𠵱家就粉黃呀、粉紅、條布呀，要求多咗。以前好興水手裝，𠵱家都唔興喇，啲人最緊要舒服、唔使熨，鍾意one-piece裙仔，唔鍾意百褶裙，費事熨餐死。」
夾棉褸取代大地牌絨褸
小時候，冬夏兩季校服各一套，運動服各一套，外加寶藍色冷衫；現在一所學校，單是運動服也分六種顏色，那時一代傳一代、校章拆了又縫，可以送給鄰居叔伯兄弟的大地褸已被淘汰，「你睇吓呢件棉褸，夾棉㗎，啲學校今年新轉，casual啲囉，平過絨褸少少，係手工多，條腰仲有索帶。」
她分析，天主教學校、東華三院學校的校服一般較新潮講究，「我哋鍾意做出名嘅學校，因為多學生，長做長有，𠵱家我哋投標做校服都講求透明度，校服嘅設計唔係淨係校長決定，家長教師會都會傾埋一份。」
製衣廠插手圖分一杯羮
回歸十年，工廠北移，那些仍留守香港的製衣廠苟延殘喘，「青山道好多製衣廠接唔到出口單，就轉做校服，覺得個market大，想入行做，點知做唔住，一年、兩年就執咗笠。」這位行內人點出箇中原因，「做成衣，一張order做一個款，𠵱家一間學校就做十幾款，又要同間學校傾，唔係咁容易，呢幾年，少咗生意。」
對彭婉碧而言，過去十年，最大轉變的除了教育制度，還有同學仔的身形，「一係就個個奀癡癡、瘦蜢蜢；一係就34吋腰，好高大，都唔知點解咁高大。以前19號細碼好多人要㗎，𠵱家啲人高咗同肥咗，要着成28碼，大人size，用尺度都攬唔晒。」
對於未來計劃，把做校服視為終身職業的彭婉碧說視乎政策，「第日唔知會唔會唔興着校服呢？可能戴個校章就算，如果多啲細路仔咪做吓囉。」
回歸10年倒數56日