運輸署噚日舉行第五次自訂車牌拍賣，少咗新鮮感，丁財不旺，最巴閉係有位叫Betty嘅太太，以全日最高價15萬投番自己個名。呢位太太冇講先生貴姓，總之唔係要坐A1嗰位Betty，亦唔ugly啦。佢好口響，「個牌一啲都唔貴，因為係我個名嚟嘛。」事關老公科水，有大水喉射住，Betty再投多兩個靚牌先走。
ATV輸九條街
自訂車牌始終以人名最煞食，英皇集團派代表用10萬蚊，投咗個「JACK1E」車牌送畀成龍大哥，舉手代表話預算要50萬，10萬蚊到手抵到極。舊年TVB車牌以80萬賣出，噚日輪到ATV，95,000蚊就有交易，由車牌公司投得，平TVB一大截。亞視綜藝、公關及宣傳副總裁葉家寶噚日回應話：「我哋冇去投到，原因同錢無關，係我哋認為冇咁嘅需要，唔使用呢個車牌嚟代表亞視。」連車牌拍賣價都輸九條街，二奶台宿命難破，真係陰功。