星期日敏妮要做朋友婚宴嘅司儀，一班姊妹圍埋諗點玩新郎之餘，竟然圍住敏妮問有冇聽過投資相連壽險。
投資連壽險 唔係穩賺
以為嗰位姊妹做保險agent，要向敏妮推銷，點知佢話：「最近我個保險agent游說我將原來嘅壽險，改為乜嘢投資相連壽險，佢話有紅利，同樣供咁多，但日後攞番嘅錢可以多過我之前嗰份。」
呢位姊妹個保險agent推銷嘅投資相連保險，睇個名就知同投資有關，實際係乜亦唔難理解，簡單嚟講，壽險就係死咗先有得賠，市場上比較普遍嘅終身壽險除咗壽險保障，另加儲蓄成份，你供保險嗰陣時一部份用嚟買壽險，另一部份就好似做定期存款咁，所以到期就可以攞番份定存。至於投資相連壽險，咪就係投資＋壽險囉，羊毛出自羊身上，之所以有紅利，係因為你供保險嘅時候，部份供款拎咗去投資，有錢賺咪有紅利分囉。
就係因為咁，所以買呢類壽險要好小心，任何投資都唔係穩賺，賺幾多要睇你能夠承受幾多風險。另外投資相連壽險嘅供款，用嚟投資嗰部份同月供基金差唔多，但保險合約一般比較多限制，冇你直接買基金甚至將啲錢月供股票咁有彈性。
專人投資 有辣有唔辣
嗰位姊妹問：「咁好唔好轉供投資相連壽險。」
對於我嚟講，買保險係買份保障，當我有乜冬瓜豆腐時，屋企人都有筆錢用；至於揀終身壽險，係因為保費唔會因為我年紀增加而要加錢，並唔係貪佢嘅儲蓄成份。
對於敏妮嚟講，我信自己嘅投資眼光，暫時仲未需要專人幫我投資，所以我買終身壽險就夠。
不過，各人嘅需要唔同，所以先會有唔同嘅產品出現。啱唔啱就睇你嘞。