美國道瓊斯工業平均指數衝破咗萬三點，仲屢創新高，一眾網民又點睇美股後市呢？
《華爾街日報》網上版搞咗個調查，請網民估吓道指下一浪會回落至萬二點低位，抑或上闖萬四點高峯，結果發現有份投票嘅4600人之中，好友同淡友分別佔54%及46%（見圖）。
網友jdfree喺討論區留言話：「一般嚟講，08年大選之前，經濟同政策都唔會出現大變動，而世界其他地區又唔見得有咩大危機，所以我覺得美股破萬四關嘅機會，應該會大過回落至萬二點；我相信市場𠵱家最大嘅隱憂，係會唔會有類似Enron爆煲事件出現啫。」
CraigRead認同股市會繼續向好，「如果樓市進一步惡化，聯儲局都會透過減息嚟刺激經濟，從而利好股市；再者，市場基調仍然良好，短期內加息嘅可能性似乎唔大。我預期美股年底會見13500點。」
不過，亦有唔少網民覺得美股升勢可能只係曇花一現。JayMaloney估計，美股有可能會向下調整至萬二點。Denisetoo2007認為，美元貶值、樓市冷卻加上次按危機都可能損害經濟，「我估道指極大可能回落至12400點。」
揀啱好股懶理短線
MarkKelly就覺得投資者最緊要係做好本份，「入市前要做好功課，發掘多啲有遠景嘅優質股嚟買，使乜理股市短期升定跌吖。」
市場分析員MichaelKahn喺美國《MarketWatch》網站撰文指出，美國係一個負債國家，外資一直都有購買大量美元資產，美元貶值會降低佢哋嘅回報，促使外資離開美國，轉投其他更高回報嘅市場。到時僅靠內需根本不足以消化咁多供應，如此一來，股市必然下跌。不過，佢就睇好美元仍可企穩重要支持位，對美股後市唔會太悲觀。