星期三、星期四連續兩日凌晨有歐冠盃球賽，因關乎邊一隊打入決賽，左丁山頂住眼瞓，朝早三點鐘就坐在電視機前，結果係曼聯與車路士為咗爭英超聯冠軍，打生打死，球員體力不支，雖然首回合贏咗，次回合作客就冇晒力，雙雙出局，由兩隊老早已經失去聯賽冠軍希望，十分輕鬆嘅利物浦與AC米蘭贏咗，喺五月二十四日凌晨重演二○○五年歐冠盃決賽。
先講利物浦對車路士。利物浦有備而來，喺上星期六對樸茨茅夫，收起正選，呢場就體力十足，踢出九成水準，將一隊疲不能興嘅車路士擊退。車路士全隊冇力，勝在有質素，踢出七十五分水準，都捱到加時，射十二碼，算係咁咯，你睇鐵人林柏特全場滿面疲態嘅樣，中場冇咗波歷克、前鋒冇咗舒夫真高，都知道車仔係有心無力。
曼聯喺上星期六出盡食奶力，反敗為勝，擊退愛華頓，幾乎穩奪聯賽冠軍，值得高興，但付出代價好大，去到聖西路球場，碰上一場大雨，全隊好似唔識踢咁，C朗行行企企，朗尼、傑斯二人冇晒速度，史高斯怕領黃牌，冇厘火氣，後防四人就好似天花板開咗一個大窿，與AC球員相比，曼聯嘅奧沙、布朗、費力查，軒斯，完全唔夠班，踢AC後備都冇資格。AC嘅老將施多夫夠晒老練，天才卡卡光芒四射，中場加度素有一夫當關之勇，碰上全隊曼聯球員好似剛剛跑完馬拉松先至入場同AC鬥跑一千五百米咁嘅款，死晒火喇。以曼聯球員水平，只能集中精神爭英超聯冠軍，爭歐冠盃就力有所不逮咯。
利物浦就知道唔可以貪心，全力爭奪歐冠盃，在英超聯只求打入第三、第四名，結果如願以償，但球隊高層就好想贏英超聯，敗走歐洲在所不惜。利物浦領隊賓尼廸斯十分清醒，佢話：「贏英超聯真係好難好難。每個星期都見到曼聯車路士贏波，壓力極大。」贏AC米蘭有冇希望呀，左丁山大膽預測兩隊踢到射十二碼，利物浦贏。