天氣話熱就熱，成個禮拜都冇乜點着過長袖衫，行快兩步都流晒汗。人一熱，胃口都冇咁一半，趁住今日禮拜唔使返工，一於喺屋企整幾款冰凍甜品歎吓啦！不過，整完又要等佢雪凍至食得，都咪話唔嘥氣，所以師傅就教大家平時擺定啲生果入冰格做生果磚，整甜品時落幾嚿，即刻食得，天然又冰凍。
記者：劉嘉蕙
攝影：楊錦文
示範：聰嫂私房甜品聰嫂（27069955）
椰汁涼粉鮮雜果
需時：3分鐘
價錢：$15/2人（視乎所選生果而定）
材料：忌廉2湯匙、椰汁2湯匙、涼粉4湯匙、蜜瓜/西瓜/香蕉/芒果/士多啤梨等水果適量
做法：忌廉加入椰汁作汁底，全部水果切粒放入碗中，按個人喜好可加入涼粉、蒟蒻等食材。
貼士：先雪凍水果才做此甜品。
楊枝甘露
需時：20分鐘
價錢：$7/2人
材料：芒果2個、沙田柚1塊、西米3湯匙、糖水2湯匙、椰汁1/3罐、忌廉2湯匙
做法：西米先浸水，煮約10分鐘至透明，熄火焗約5分鐘至其發脹，即時用凍水沖以免結塊。沙田柚撕成條狀備用；芒果起肉，加入糖水/忌廉以攪拌機打勻。之後將西米、芒果粒及沙田柚放入碗，雪凍即可。
貼士：許多夏日甜品都會用上西米，平日可先煮一大鍋備用，煮好的西米可存放於雪櫃3至4天，食用時稍為用水沖散即可。
薑汁意大利涼粉
需時：3分鐘
價錢：$3/1人
材料：涼粉8湯匙、花奶1湯匙、糖水2湯匙、薑塊少許
做法：涼粉刨絲備用。薑塊刨碎，用煲魚袋包實榨汁，榨成約1茶匙份量。薑汁混合糖水/花奶，加入涼粉即成。
貼士：涼粉刨成絲比粒狀易入味，混和薑汁感覺更香滑。
芒果奶昔豆腐花
需時：３分鐘
價錢：$10/1人
材料：芒果1個、糖水2茶匙、忌廉1茶匙、花奶1茶匙，豆腐花1小磚
做法：芒果切粒預早一天放入冰格，製成芒果冰磚備用；將芒果冰磚加入糖水/忌廉/花奶，攪拌成奶昔，淋上豆腐花面即可。食用時可切幾片芒果鋪面，賣相更佳，也更好味。
貼士：用來製甜品的芒果以熟透為佳，較軟、黃、皺皮的才最香呢！
紅豆茸西米露
需時：20分鐘（未計製紅豆茸時間）
價錢：$3/1人
材料：紅豆茸3湯匙（紅豆浸過夜，煮約個多小時成紅豆茸）、西米3湯匙、花奶1湯匙、忌廉2湯匙、糖水11/2湯匙
做法：西米先浸水，煮約10分鐘至透明，熄火焗約5分鐘至其發脹，即時放凍水過冷河。花奶/忌廉/糖水以攪伴機攪勻，再加入西米/紅豆茸即成；亦可以涼粉代替西米露。
甜品3大速凍法
要食凍甜品，又等唔切雪凍佢？當然有計；不過都要閒時做定啲準備工夫嘅，以下係3個令甜品短時間變凍嘅方法。
1.加冰同水果精油
平時整定冰塊，因為加冰係最快嘅，但就會稀釋甜品味道；所以可落一點水果味食用精油，當然有些人又會覺得味道較為人工。
2.預製生果磚
如果甜品材料有水果，可預先一日將水果切粒放入冰格，製成生果磚，用時以攪拌機打勻，口感跟雪葩相若，果味更鮮甜；生果磚可存放8至10天。這樣味道就天然得多了。
3.雪定凍糖水
平時煮定凍糖水，將砂糖加水煮溶（糖和水的份量比例為約1：5），存放雪櫃備用。
