「嘟嘟嘟嘟嘟……」每日人流量逾220萬的地鐵，令朝九晚五的打工仔女又愛又恨，雖然快捷準時，但要忍受部份毫無公民意識的自私乘客，肆意「喺MTR度化妝」、「迫到爆仲要睇報紙或打機」、「人迫仲用力推埋嚟」、「攞東西霸位」、「在人迫的車廂內放屁」……令網友「一肚氣」，近日在討論區力數「無禮客人N宗罪」，得到許多和應。
豬扒當自己係貂蟬
有網友「一輪嘴」數臭無禮客人，「唔趕時間但門一開即刻衝出去上扶手電梯做第一，去到只係企喺度！在電動行人道上左穿右插，咁趕嘅行無電動嗰邊囉，跑都無人理你！本來排喺後面，開門時前面嗰個都入唔到佢入到，勁狗！車廂勁多人，啲『柱男柱女』仲靠埋條柱度。嘟八達通時懶快，前面嗰個未scan佢就嘟，搞到好麻煩，勁白癡！喺地鐵面對面你眼望我眼好正常，有啲豬扒當自己係貂蟬，唔覺意望到佢一眼，佢即刻雙手護胸。」
另有網友補充稱：「上咗車但死唔行入去要企喺門口、超級肉麻情侶當車廂係屋企做核突嘢、已經迫到想死，但仲有人喺正你前後左右大聲講電話，甚至feel到佢哋啲口氣或者呼氣，想死！」
地鐵無禮客人6宗罪
1.唔趕時間但要行頭
2.在電動行人道上左穿右插
3.排在後面「打尖」入車廂
4.車廂人多，仲靠埋條柱度
5.「嘟」八達通時懶快，前面嗰個未scan佢就嘟
6.豬扒扮貂蟬，成日以為人望佢
資料來源：she.com討論區