ILoveYouBoyz主持兩集《愚樂ILoveU》，內容是他們與監製合力構思的，由度橋、用甚麼道具，甚至被整蠱藝人會有何反應都要花心思研究。少爺占謂急才是必備條件，因為每人被整蠱後的反應都不同，他說：「有時藝人嘅反應係我哋預計唔到嘅，有時都會畀佢哋嘅反應嚇窒，夏雨嗰次就係一個好例子，但嗰一刻我哋又要顧全番成件事，要好快諗一個反應畀佢哋，令個藝人繼續畀我哋整蠱落去，呢點係事前冇得準備，亦係最難嘅。」
在兩集的節目中，Donald表示夏雨發火的反應，最令他不知所措，他說：「夏雨真係發老脾，我初時都畀佢嚇親，後來佢話自己一早知我哋玩佢，所以做番場戲玩番我哋，呢啲就係整蠱節目有趣之處，你唔知幾時會俾人整蠱番。同埋有時我哋連藝人身邊嘅人都要呃埋，好似鄭融咁，我哋連佢唱片公司嘅人都要呃埋，咁成件事嘅可信性先增加，但係我都想同佢哋講番聲唔好意思。」
難忘蓋世寶流淚
阿占對於蓋世寶的印象最深刻，當時他們要求蓋世寶打電話向安德尊借錢，有份戲弄蓋世寶的安德尊答應借錢之餘還處處關心對方，最後蓋世寶被感動得忍不住落淚。少爺占說：「初時佢都冇乜嘢㗎，後來因為安德尊好關心佢，蓋世寶就因為自己整蠱咗對方，因為覺得內疚而喊起上嚟。」少爺占及Donald表示要向一眾被他們整蠱的藝人致歉。