久未露面嘅莫少聰（阿聰），令大家印象深刻嘅一定係佢喺《黃飛鴻》系列中飾演梁寬一角，不過一副打得嘅外表，出奇地唔單止唔飲酒、唔愛蒲，佔佢最多時間反而係運動，就連DreamCar都擺到明話要架同佢一樣剛柔並重嘅寶馬開篷325iA先至襯喎：「佢穩重得嚟又有活力，能動亦能靜，正所謂文又得武又得，一啲都唔老餅，Fit晒我，佢直情將我成個人Upgrade咗㖭呀！」
文：許一楓
攝影：譚盈傑
為陽光鍾愛開篷車
唔見陽光唔開心嘅阿聰，就算幾晏收工，朝早9點前一定起身出外放狗同跑步，仲會揸住架愛驅周圍去，「我好怕見唔到陽光，有陽光代表有活力嘛，所以早早起身揸住架開篷車四圍去，一路開車一路聽收音機，一個人靜靜咁享受陽光，喺架車度做咩都得，唔使俾人管，好自由奔放同舒服，夜晚一放工就返屋企，享受吓家庭生活。」
阿聰本身好鍾意開篷車，最重要係可以邊揸車邊享受日光浴：「呢架BMW325iA賣相斯文穩重，雖然內櫳簡單，但不失貴氣感，望真啲仲好健康同有活力，夠晒Sporty！剛柔並重，襯晒我啦！」
炒到架車打3個觔斗
人成熟了卻愛悠悠閒閒遊車河，但後生時總會愛飆車呢。「剛入行時好勝心強，經常揸快車，考驗吓架車同自己嘅極限。」咁即係點？「當年23歲，揸住架寶馬323i由清水灣出九龍，去到油站突然心血來潮踩快咗，點知入彎先見到架巴士喺前面，卒之成架車炒埋去，最驚險係剷咗上壆，好似特技人飆上斜台咁成架飛起，再凌空打3個觔斗先落地！」落地後成架323i變晒形，最不可思議係阿聰只係手板少少擦損，仲笑笑口行落車，最搞笑係對面線啲司機落晒車，拍晒手鼓掌，好似我做緊特技表演咁，講真，大家咪學！」
揸車同運動一樣唔急得
喺北京工作同生活咗一段時間，香港呢邊銷聲匿迹，究竟阿聰怕唔怕被香港影迷遺忘？「有人問過我，唔喺香港搵食，搵少咗錢會唔會感到可惜？其實我覺得人生有唔同階段做唔同嘅嘢，𠵱家可以選擇自己鍾意做嘅野，享受生活好開心，錢唔可以帶落棺材，人生最重要係健康同開心！」
阿聰坦言北京同香港對佢嚟講分別不大，喺北京除咗拍戲，平時嘅生活同喺香港無分別，「我好簡單，唔想過緊張嘅生活，跑步、游水、打Golf同揸車一樣，唔好心急，最重要係你可以好Relax咁享受生活，安全咁揸車享受當中嘅樂趣。」
325iA開篷似變形金剛
寶馬呢款325iA，唔止馬力強勁，就連開篷都特別過人；三幅式篷頂反嚟反去，接合後又鬼咁啱位，似番架硬頂跑車，抵讚！
BMW325iACabriolet規格
引擎：2,497c.c.直6DOHC
馬力：218ps/6,500rpm
扭力：250Nm/2,750-4,000rpm
傳動：6前速Steptronic半自動波，後輪驅動
新車售價：$578,000
查詢：BMWHK（27145271）
仍然Fit到漏油
近年專心北上發展嘅阿聰，已經好少喺香港傳媒中亮相，今次適逢佢短時間在港逗留，梗係拿拿臨說服佢上《同車蜜語》啦！阿聰亦相當爽快，喺電話溝通幾句大家已有共識，更即時約埋喺中環見面。
訪問當日，老遠已望到一個好Fit嘅西裝友，不知何解，一份親切感油然而生，再近距離跟他打招呼，感覺依然令人舒服。老實講，真係無諗過阿聰個樣仲係咁Young，應該同劉華差不多同期出道，但阿聰仍像陽光大男孩般充滿活力，然而在拍攝途中除下外套，露出兩隻大碼老鼠仔，另一股澎湃佬味當堂出晒嚟！
「我好Sporty，唔拍戲時都係做運動，無咩其他嗜好，運動可以Keep住一個人嘅狀態，又健康，絕對有益，可能因為咁所以個人都後生啲啩……哈哈！」
BMW首部硬摺頂開篷車
一直以來，BMW開篷車以電動軟篷作配搭，但新一代3系Cabriolet一反傳統，改配開關僅需22秒的硬摺篷頂，成為有史以來BMW首部配備電動硬摺頂的開篷車。當關上篷頂後，賣相更跟3系Coupe跑車相似，望落一樣咁有型！
記者：鄭達基