肥龍連任政務司司長塵埃落定，唐唐想更上一層樓，怕且要等多一陣。獅子銀行鄭大班噚日接受港台訪問，點評回歸以來煲呔、阿松同唐唐三個財爺。鄭大班身經百戰、位高權重，梗唔會踩人，總之三個都係叻人，最畀面唐唐，認為佢「有能力更上一層樓」。
點評三任財爺
鄭大班話煲呔同阿松任內，香港經濟都有好大危機，前者落柯打入市打大鱷，後者就要加稅免庫房見紅，都做得好辛苦；唐唐接任，香港經濟已經穩定落嚟，不過要搞GST同做好政府收支盤數，佢話睇番過去兩年香港財政同經濟發展得咁好，唐唐又係真心聆聽各方意見嘅人，絕對有能力繼續做財爺，甚至更上一層樓㖭！至於唐唐去向，要由佢本人決定。（乜唔係要睇中央決定咩？）
明踩社會企業
點解鄭大班力撐唐唐，有一個講法係反映商界公開保送唐唐上位，令唐唐行程再漲；另一派人就指回歸後獅子銀行影響力今非昔比，既然中央都like唐唐，鄭大班做個順水人情啫，實情係點，聽埋佢點講先啦。對於煲呔，原來佢唔係得個讚字，而係有意見嘅。佢話自己真係唔明政府嚟緊想搞嗰啲社會企業，實際究竟係乜，聽完高官噏完一大輪嘢，都係唔清楚社會企業係乜意思，係咪龍騰墟（正確應該係騰龍墟）嗰隻大笪地就係呢？
發展社會企業（即係畀弱勢社群做啲可以服務社區，但商界又唔會做嘅小生意）係煲呔主要政綱，如意算盤係想商界出錢出力，培訓弱勢社群做小生意，好多擦鞋仔慌死蝕底，未聽完就叫好，鄭大班頭腦清醒啲，聽落覺得唔多妥，直斥其非，好坦白咁話，佢唔明煲呔想做乜，亦唔知呢樣嘢點樣幫助弱勢社群。
議論完唔知社會企業係乜後，鄭大班終於入正題，公開向煲呔還價話，如果要搵大企業幫手，佢哋可以幫吓年輕人創業，亦可以提供啲實習職位畀佢哋攞工作經驗，呢啲嘢佢哋做得來，但如果要商界捐好多錢就唔係咁易話為，可能有啲難度。鄭大班話香港唔同外國，外國啲稅收好重，所以大公司寧願捐多啲錢，但香港如果要捐多啲，小股東隨時反對，擔心派息會少咗，所以佢哋只能盡力而為啦。鄭大班咁快閂後門，呢壇嘢睇嚟好難搞。