兩屆全國政協委員翟暖暉最明白，甚麼叫黑暗歲月。三更半夜，半山西摩道的寓所傳來急促的拍門聲，半夢半醒之間，翟暖暉被指煽動暴亂，被五名警員押走，坐了兩年文字獄。他怪警察胡作非為，怪左派殺錯良民，更怪自己盲從附和：「我希望新一代嘅人，唔好再做思想奴隸，我哋做過嘞，你哋要有獨立思考。」
承印三左報招牢獄災
1967年8月9日清晨4至6時，五名來自《香港夜報》、《新午報》及《田豐日報》三家報社的相關人士被捕，包括承印報章的南昌印務公司股東兼持牌人翟暖暉。警員清晨四時半踩上半山西摩道，拍門聲驚醒了全家，翟太開門，一、二、三、四、五，五名警員進入翟家：「入到來，一個守住電話，一個守住騎樓，一個守廚房，一個企喺度唔知做乜，一個就係阿頭。」
「個警察阿頭問我南昌嘅嘢，我都仲未知發生咩事。佢抄低晒我講嘅嘢，然後叫我簽字。我簽完，佢就話：『我𠵱家奉命拘捕你。』」翟暖暉被控「煽動」、「號召離心」、「違反印刷條例」等共21項罪名，全部成立：「南昌幫三張報紙印刷，每張各七條罪，每七條罪判三年，咁加埋就九年。好在法官好相與，話同期執行，判囚三年，七除八扣，結果坐咗兩年。」
當時香港有條《刊物管制綜合條例》，報章刊登虛假消息可構成刑事罪。生於廣東番禺，現年88歲的翟暖暉來港後一直從事出版工作，67年6月，左派報章連同「外圍左翼」報章發動攻勢，口誅筆伐港英政府，翟暖暉承印的報章加入戰團，發放消息煽動群眾，他卻懵然不知：「啲報道出咗我都唔知，好烏龍！」
「四十年過去，你問我最大感受係乜？我第一個諗法係，過咗咁耐都未死得！哈！哈！哈！…（言歸正傳）我當初係犯咗煽動罪，刊登教唆性文字。後來英國佬cut咗呢條嘢（法例），點知回歸之後政府又返轉頭要立法（指《基本法》23條立法）。我坐過監，好唔願意見到人哋好似我咁因為文字坐監。老實講，我八十幾歲就冇所謂，如果到時真係立法，你哋班報紙佬就淒涼囉。」
為放炸彈睇低工聯會
翟暖暉自言從沒參與鬥爭，更與放炸彈的「鬥士」劃清界線：「我一聽到擺炸彈，就知道今次實死。冇人希望動武，你一放炸彈，就表示同社會脫節，你會更加孤立，好鬼討厭。我從此睇低工聯會班人，所謂鬥爭應該有秩序，唔係日日咁衝去總督府，送羊入虎口，好似唔俾人打過唔舒服咁。」
六七暴動是一道歷史傷口，死傷慘重。這位已退休的兩屆全國政協委員說，無論是組織鬥爭的左派勢力，還是鎮壓防暴的警隊，都要為慘劇負責：「當時啲警察，成日亂咁拉人打人，好乞人憎。」所以他認為六七暴動還是有正面意義的：「暴動過後，政府即刻改善制度，肅貪倡廉。如果冇六七暴動，英國佬可能唔會郁，或者郁得冇咁快。」
英國人吸取了教訓，中國人呢？翟老搖搖頭說：「中國人長進得好少，六七暴動呢單嘢，中央都有責任。我希望新一代嘅人，唔好再做思想奴隸，我哋做過嘞，你哋要有獨立思考，樣樣都要問過自己啱唔啱先去做，到時就算做錯咗，都係自己嘅事，唔係俾別人唆擺…唉！如果當初個個識咁諗，就唔會有六七暴動喇。」