以喪屍為題材嘅恐怖片，曾經一度沒落，直至四年前爆出一齣《28日後》（28DaysLater），導演丹尼波爾（DannyBoyle）將原本慢吞吞嘅喪屍變成識得極速狂奔，一下子將喪屍片公式改寫。最近原班人馬再拍續集《28週後》（28WeeksLater），延續上集末世倫敦格局，但特技同血腥都大為加碼，啱晒一班恐怖片嘅Fans。 撰文：戶川淳
本星期四（5月10日）上映嘅《28週後》由《28日後》嘅編導監製鐵三角丹尼波爾（DannyBoyle）、安德魯麥當奴（AndrewMacdonald）及亞力斯加蘭（AlexGarland）合力炮製，但由於佢哋早前忙於搞楊紫瓊主演嘅《太陽倒數》（Sunshine），因此導演一職需要假手於人，結果搵到憑懸疑片《Intacto》享譽國際嘅西班牙導演JuanCarlosFresnadillo執導，希望為片中嘅倫敦賦予全新視野。
親自操刀拍序幕
不過退居監製嘅丹尼並冇偷懶，佢除咗有份度故事之外，更充當咗三日第二組導演，片中嘅序幕就係由佢親自操刀，正好當正式交個波畀續集嘅導演，fans一定要留意。
劇情顧名思義，發生於上集故事嘅28個星期之後，英國政府喺美國軍方協助下，將上集嘅瘟疫成功消滅，並開始重建倫敦，首批倖存落嚟嘅災民都開始被遷入隔離區，一個個破碎嘅家庭亦隨之團圓。點知其中一個家庭之中暗藏驚天秘密，為人類帶來更大災禍，總之講到尾，就係會令到喪屍再度來襲啦！
英倫地標變廢墟
同上集一樣，齣戲想講嘅當然唔係喪屍咬人咁簡單，而係繼續探討人性嘅黑暗面，不過今次牽涉嘅人物同層面更廣︰假如政府設立隔離區情形會點？全倫敦嘅人口只剩下500人，倖存者會點生存？英國又會點處置外國嘅難民？認真嘅劇情背後，今次製作及動作場面仲全面提升，大隊借用倫敦碼頭區IsleofDogs作為片中隔離區District1外景，上次倫敦TowerBridge人影都冇一隻已經好震撼，今集連TrafalgarSquare、RegentsPark同MillenniumBridge等地標都變埋廢墟，大家睇完實好有feel。
話你知：卡特里娜災情攞靈感
《28日後》齣戲其實有啲邪，記性好嘅話，會記得當年上映時，全球正巧合地爆發非典型肺炎。因此今次美術指導MarkTildesley設計場景時，索性搵現實災難吸取靈感，例如卡特里娜颶風（HurricaneKatrina）後，災民流離失所、排隊輪候救援情況，以及政府人員清理災場嘅景象，去營造倫敦劫後餘生嘅感覺。另外攝影師JeremyRenner刻意將齣戲拍成紀錄片咁，製造一股不寒而慄嘅真實感，令觀眾更為不安。