娛樂圈「金句王」黎明（Leon）噚日去中環中銀大廈70樓，出席「全國名廚薈萃為公益」慈善晚宴記者會，繼續盡展其「金句王」本色。
噚日Leon着短袖衫出現，甫上台就話自己着錯衫，佢話：「上次我就着錯厚衫，今日諗住煮嘢食就着短袖衫，點知就高處不勝寒，上到最高層次原來係咁凍。」Leon仲話喺本月18號舉行嘅公益金晚宴上，親手炮製三盆佛跳牆義賣，每盆底價5萬蚊。
否認被迫減肥
講到下廚，Leon話自己表現OK，但係問到佢會唔會親自下廚冧女友樂基兒時，佢就話：「今日係講公益金，唔係訪問公益金女友，唔好再講女友。如果我平時喺屋企煮嘢食，咁你哋就聽唔到我《4inLove》隻碟同埋睇我啲戲，總之私人時間睇個mood自然就會嚟，煮公仔麵？有工人煮啦。」大家只係問佢會唔會為女友下廚，佢就四両撥千斤宣傳新碟，馮仁昭真係要寫個服字。
另外，對於內地有報道話Leon拍電影《梅蘭芳》後被下令減肥，佢就否認其事，仲自爆有內地記者打電話畀經理人，話呢啲只係小道消息，用嚟谷新聞。Leon話佢身為演員，都會為角色造型花心機，令效果更好。至於有傳佢同新加盟嘅楊千嬅不和，Leon就強調冇咁嘅事，仲話對千嬅嘅新碟絕對有信心。
