黎耀祥和太太Julia結婚10年，育有一子黎正橋，兩夫婦一直讓囝囝自由發展，但當發現他行為不當，祥仔會即時扳起嚴父的臉孔糾正。或許這就是愛之深，責之切吧！ 撰文：比華利
黎耀祥和Julia於97年在美國拉斯維加斯結婚，同年誕下兒子黎正橋。經常在螢幕上扮鬼扮馬的祥仔，現實生活中，也是大細路一名，與兒子嬉戲時份外投契。現年9歲的正橋正值發育期，祥仔夫婦經常鼓勵他多做運動，兩父子日前在寓所附近打籃球，比試完球技後，好動的正橋意猶未盡，再與爹哋媽咪拗手瓜決高下。
重視平衡發展
提到教仔心得，祥仔很重視傳統德、智、體、群、美各方面平衡發展，最反對父母用物質來滿足子女。正橋早前渴望擁有一部新款遊戲機，但祥仔堅持不買，他說：「我成日同個仔講，爹哋買部遊戲機畀你好容易，畀部機佢打，我就可以大覺瞓，但解釋點解唔買畀佢先最難。我希望父子之間可以建立感情，我有時間就會陪囝囝做運動，一來可以令佢強身健體，二來大家可以透過互動增進感情。」
擁有健康體魄，也需要培養良好的品德，祥仔說：「𠵱家嘅家庭多數生一、兩個細路，小朋友通常喺大人堆中長大，佢哋好容易變老人精，有時仲唔覺意學埋大人嘅口脗。我好緊張囝囝嘅禮貌，一發現佢唔啱，我會立即糾正。」祥仔給予正橋底線，倘若他踩界，祥仔會扳起嚴肅的臉孔提示，他說：「我好反對小朋友挑戰父母權力，個仔係我生係我養，我都算係佢米飯班主，唔通教佢都冇權？」
全程黐實爹哋
祥仔認為子女連對父母的基本禮貌都欠奉，會影響將來待人接物，他說：「佢都唔識尊重人，將來出去社會做嘢，同上司、朋友相處都有好大問題。」小記與祥仔傾偈時，正橋猶如搽了強力萬能膠，全程黐實爹哋，兩父子打完籃球後，他們一樽水兩份飲，一條毛巾兩份抹汗。正橋又用十指替爸爸提供按摩服務，祥仔安慰的說：「佢揼骨幾夠力，又舒服，同埋識得用手踭去按壓，手勢好掂。」祥仔夫婦早前到泰國工作，正橋因為太掛念爹哋媽咪，竟一日內發出100個短訊給他們呢！
黎耀祥髮型：IvanLee（Headquarters）
本欄逢周六刊出
