靚女出巡，引來無數狂蜂浪蝶，一班攝影發燒友得悉陳法拉、鍾嘉欣昨日在沙田連城廣場擔任嘉賓兼評判，兩小時前已經聚集在商場內。時裝騷開始，場面變得十分混亂，陳法拉出場時，一班攝影發燒友一擁而上，推倒現場圍欄，之後出場的鍾嘉欣被迫終止行騷的部份，圍觀群眾更加噓聲四起。鍾嘉欣都是第一次遇到這樣混亂的場面，她說：「都有啲驚，真係行唔到，都幾亂，現場觀眾好熱情。」
陳法拉最近頻頻接騷搵真銀，應該進賬不少，她說：「少少啦！未開劇有時間可以賺外快，本來賺到錢想買車，不過公司宿舍有人搬入嚟，我就搬咗去將軍澳。」搬新屋，法拉有沒有電召一班緋聞男友幫手？她說：「唔需要，最近多緋聞，費事搞人哋！」
採訪：楊潔雯
攝影：陳志嵐