無綫新紮姐仔楊秀惠，前晚穿上火紅低胸露背裙出席名錶活動，打扮性感誘人，引得好友胡定欣忍不住掃其玉背，結果整甩裙帶，嚇得楊秀惠連忙雙手掩胸。事後胡定欣還得戚地說：「整甩埋佢上面，送個C1（娛樂版頭條）畀佢㖭！」這種朋友認真「交得過」。
楊秀惠、胡定欣、李亞男、姚子羚及葉翠翠等一眾無綫女星，前晚在尖沙嘴出席瑞士名錶展晚宴活動，來自大馬的姐仔楊秀惠以一襲火紅低胸大露背晚裝出席，豐滿身材表露無遺，還大晒滑溜玉背，令現場春色無邊。
掩胸夾裙防走光
胡定欣到場後，一見好友楊秀惠作如此性感打扮，即時施展「鹹豬手」，狂掃對方的玉背，豈料弄脫其背後的帶扣，兩人即時非常慌張，楊秀惠雙手掩着胸前，雙臂緊貼腋下，以防裙子鬆脫，而胡定欣則手忙腳亂欲為對方扣好裙帶，惜未能成功，最終兩人要入洗手間整理。
事後楊秀惠笑說：「嬲死佢（胡定欣）呀，之前佢原本已經話載我嚟尖沙嘴，跟住話趕唔切，𠵱家又整甩我條帶。」問胡定欣為何要狂掃楊秀惠玉背？她笑說：「佢背脊好滑，如果整甩埋佢上面，送個C1畀佢㖭！」楊秀惠聞言即笑稱：「下次整番甩佢條帶呀！」
除Bra帶曬太陽
問楊秀惠為何作如此性感打扮，她說：「吓？好開心呀，我等着呢啲衫好耐，因為我係馬來西亞人，好鍾意夏天。」那是否真空上陣？她就說：「我冇咁豪放，有戴nudebra。」
楊秀惠續說：「原本遲啲諗住同胡定欣去泰國曬太陽，不過夾唔到時間，𠵱家可能同爹哋媽咪去。」至於屆時會否裸曬，楊秀惠則說：「喺外地最多都係除條帶，唔會裸曬。」胡定欣就表示與楊秀惠份屬好友，兩人經常相約姚子羚作三人行。
採訪：胡比
攝影：陳俊強
