大學生二少近日生人勿近，事關他雙腳近日無故發出惡臭，坐在書枱前溫書做功課，臭味由下面傳上來十分惡頂，最慘同學、宿友統統閃開，「我對腳外表好正常，無傷口又無痕癢紅腫，點解搞成咁？」
二少沒有透露就讀哪間大學，他在PDA討論區稱，近日雙腳發出「餿」味，初時以為腳汗多，但抹亁腳後仍然有異味，灑爽身粉在腳上止得一時，「唔夠兩個鐘又有番朕味，係咪身體有問題？」他說曾睇中、西醫，服藥後效果不顯著，「煲過中藥飲同浸腳，但好似無乜用。」
「浸海水可能有效」
網友提供不少「家傳秘方」供二少參考，Lisa說估計二少身中頑毒，所以要以毒攻毒，「惟今之計，我建議二少用對鞋煲水，飲晒佢，飲一個星期就會無事。」網友SSK的建議無咁離譜，「可以試吓熱水加粗鹽浸腳，我朋友話浸海水可能有效。」
網友Jacky_CC稱自己都有類似煩惱，「我都係咁，一到夏天出汗多，焗住隻腳就好易發臭。」他說去年求醫，醫生指屬輕微腳癬，「畀支藥膏我搽，一個星期就冇事，不過治標唔治本，𠵱家夏天，出完汗又復發。」wahwah勸二少不要藥石亂投，「多啲着拖鞋出街，唔好焗住對腳，再快啲搵個好醫生啦。」