今次蘋果開倉由我吾中主打，主要因為蘋果波神傷心到要去散心。做乜咁傷心，咪因為佢嘅愛隊阿爾克馬爾同阿積士係大好形勢下，都無法打破燕豪芬嘅壟斷局面奪今屆荷甲聯錦標囉（雖然上星期佢喺呢度聲稱邊隊贏都冇所謂）！
史堤芬斯揸旗由蟲變龍
阿積士無法封王，我何嘗唔係仲傷心過佢呢？不過，我一於化悲憤為力量，肩負起開倉重任，今日誓要喺荷蘭球員身上攞番失去嘅嘢！雖然今日冇荷蘭波，荷蘭盃又喺星期日先至打，不過我打算喺以前阿積士球員雲達華治、尼祖廸莊同埋前阿爾克馬爾球員馬菲臣為骨幹嘅德甲漢堡身上，撈一筆。
漢堡呢間老牌球會自從轉由荷蘭教練史堤芬斯掌帥後，表現立即有起色，近11場聯賽共得7勝3和1負，目前以39分排第10（未計周五戰果），由要護級變成有機會踢圖圖盃，個勢咁勁，相信今迎波琴時不難再贏一仗。
波琴雖然亦近況唔錯，目前仲同漢堡同分，而且佢哋前鋒基卡斯入球停不了，目前仲喺射手榜領先㖭！不過，波琴嘅人腳始終差些少，與其博佢哋「客勝」，不如補注入球開「大」仲好。
英甲煞科撐森林開「和」
另外，英甲今日煞科，點都要「幫襯」少少。目前英甲聯榜首降班形勢大定，所以一於向前列球隊埋手。目前排第3嘅諾定咸森林，只落後次席嘅布里斯托城1分，只要佢哋嘅今日順利擊敗到訪嘅中游球隊克魯，而布里斯托城迎洛達咸又意外失分嘅話，森林就有機會直接升班，所以戰意毋庸置疑。
不過，由於克魯一向識入波，隊波又以鬥志好見稱，森林[-1]，不妨冷敲「和局」。
重心出擊
主客和漢堡勝
文：吾中
鍾情丹麥、荷蘭嘅大聯盟女神，可惜馬會仲未開美國波。